Cheng nuai 113.92 tih chingpen chungchangah ZPM Thalai ten Lokayukta-ah FIR an thehlut
ZPM Thalaite chuan cheng nuai 113.92 tih chingpen chungchang ah nimin khan Mizoram Lokayukta-ah FIR an thehlut.
ZPM Thalai thuchhuah chuan CAG Report No. 2 of 2021-a a lan dânin, Congress hunlai khan Mizoram Youth Commission hnênah ‘Capacity Building and Technical Assistance Scheme’ hnuaiah March 2017 khan cheng vbc. 1.32 chu Ministry of DoNER-in a release thu leh heng MYC sum-te hi nasa taka hman sual a nih thu CAG report hian a târlang tih an tarlang a. MYC hian Mizoram sawrkar hnuaia department hrang hrang 48 atangin Group B leh C mi 1,499 te hnenah April 2017 - May 2018 inkâr khan ni 21 chhûng theuh Computer Class an kal tih ziahna Loose Attendance Sheets chu Audit hma ah an phawrh tih pawh an tarlang a.ZPM Thalai chuan Audit hian Department 48 hnênah verification request thawnin, verification request hi department 3 (FCS&CA, H&FW leh PWD) ten chhang lovin Department 45 in chhânna an pêkna atangin Training kal ni-a târlan mi 1499 atang hian mi 1,300 zet chu department-ah an hming a taka hmuh tur a awm loh thu leh mi 7 chiah a taka Department-a an hming hmuh tur awmin, chung zinga 2 pawh chu Training tura an hming thlan zîngah an la tel lo cheu bawk tih an tarlang a. Report thehlut ve lo Department 3 atang hian mi 199 an training thu târlan niin heng ho pawh hi hming lem bawk an ni thei mai ang em tih chuan ngaihtuahna a tih thui thu leh he thilah hian sawrkâr sum cheng nuai 113.92 hi dik lo taka hman a ni tih an tarlang a ni.
ZPM Thalai thuchhuah chuan Congress sawrkar hunlaia mipui sum cheng nuai 113.92 hman khawlohna hian mipuite rilru a tina em em nia tarlangin, Congress hunlaia mipui sum hman khawlohna kawnga inhnamhnawih-te'n hremna an tawh ngei theihna turin Mizoram Lokayukta-ah FIR an thehlût tih an tarlang a. “Opposition an nih hnua a tha ber niawm taka 'That loh theih lohna bawm' hmanga rawn inzuarte hi an Ruling laia an sapatal dan kha Zoram mipuite hian kan theihnghilh lo,” tiin Congress chu opposition-a an awm chauhin an that thu leh Opposition-a an awm hian That loh theih lohna bawmah kan khung khawm a ni mai tih chu ZPM Thalai ngaihdan a ni tih an tarlang bawk a ni.