India ramah BJP an sawrkar atangin hmasawnna hmuh theihin a thleng - BJP President

BJP Mizoram Pradesh President Vanlalhmuaka chuan India ramah BJP an sawrkar atangin hmasawnna hmuh theihin a thleng nia sawiin, Mizoram hmabak thlir chungin ‘Zoramthar’ kan beisei thlenna kalkawngah chuan BJP chiah a awm niin a sawi bawk.

BJP dinchampha puala BJP Mizoram Pradesh in Aizawl-a an Office-a inkhawm nimin-a an buatsaih ah BJP mizoram Pradesh President Vanlalhmuaka chuan India ramah BJP din champhaphak vawi 42-na chu hmun hrang hrangah hman niin, April 20, 2022 thleng hun hman tur a nih thu leh miretheite tana PM Scheme hrang hrangte mipuite hnenah inhrilhhriatna hun hman tur a ni tih a sawi a. India ramah BJP an Sawrkar atangin hmasawnna hmuh theihin a thleng tih sawiin, “Mizoram Politician ten an sawi thin angin hmasawnna hi a zuan in a zuang dawrh dawrh a, chu hmasawnna chu Mizoram-ah pawh thil thlir zau deuh te chuan kan hmu in kan hre theuh tawh awm e,” a ti a. India ramah BJP History thlirin hun harsa tak a pal chho tih sawiin, Mizoram-ah pawh chutiang tho chu an nih thu a sawi bawk.

BJP President hian tunkar Thawhlehni khan Dampa bial tlawhin Kanghmun Community Hall-ah thalaite nen inkawmna hun an nei a, he hunah hian India ram politics kalphung sawiin, India ram chu Congress leh a thurualpui ten hun rei tak an lo kaihhruai tawh thu leh hmasawnna chhenfakawm tak erawh min hnutchhiah lo niin a sawi a. “Chutiangin Mizoram-ah pawh Congress leh MNF in kum 30 chuang chu min hruai tawh a, nimahsela kan ram dinhmun en hian a lungawithlak loh hle thung a ni. Hemi anih avang hian Mizoram hmabak thlir chungin ‘Zoramthar’ kan beisei thlenna kalkawngah chuan BJP chiah hi a awm a ni,” a ti a. Mizoram damna tur leh Zoramthar kan beisei hi BJP kaltlang hian Pathian hian min pe ngei dawn nia sawiin, chumi kalkawng atan chuan he bial-ah pawh hian kum 2023 in-thlan ah BJP thlantlin a pawimawh dawn hle tih a sawi bawk a ni.