Sanitary Napkin Vending Machine leh Incinerator sem

Health Minister Dr. R. Lalthangliana chuan nimin khan Hnahthial District chhunga School 31 te hnenah Sanitary Napkin Vending Machine leh Incinerator semna hun a hmanpui.

Hnahthial Electric Veng Community Hall-a Sanitary Napkin Vending Machine leh Incinerator semna hunah hian Health Minister chuan hmasawnna daih rei leh tlo nei turin zirna, faina leh hriselna lama hmasawn chu thil pawimawh hmasa berte zing ami a ni tiin, hemi kawnga hmanraw pawimawh tak Sanitary Napkin Vending Machine leh Incinerator te zirlaite tana ruahman saktu Samagra Siksha chungah lawmthu a sawi a. Faina leh hriselna kawngah Mizote pawhin hmasawnna tur tam tak kan la nei tih sawiin, taksa insawizawi, ei leh in uluk, zuk leh hmuam laka insum, kan chenna leh hnathawhna hmun te enkawl fai leh khawtlang zun In enkawl fai kawngah te tan kan lak tlan a tul takzet a ni, a ti a. Ram leh hnam hmasawn zelna turin mitinten mahni zawn theuhah kan theih ang tawkin midang tana luanchhuah kan tum theuh a pawimawh takzet tih a sawi bawk.

He hunah hian Hnahthial DEO leh Samagra Shiksha-a DPC Mickey R. Lalenkawla chuan Samagra Siksha hnuaia naupang hriselna leh faina kawnga hmalakna, Equity Intervention, Adolescent Health and Hygiene scheme kaltlanga he hmalakna hi kalpui a ni tih sawiin, tun tuma Sanitary Napkin Vending Machine semchhuah te hi pad 50 lenna khawl niin Hnahthial District chhunga School 31 te hnenah hlan an ni a. Khawl hi pawisa thir hmang niin Pad pakhat hi cheng khat (Re. 1/-) thir hmangin a lakchhuah thei a ni. Sanitary napkin te hi a thlawna pekchhuah a nih theihnan Samagra Siksha hotute chuan sawrkar laipui hotute hnenah an thlen mek thu a sawi a. Hmeichhe zirlai 50 aia tam awmna School-ah te Pad 100 lenna khawl la sem leh tum anih thu leh Mizoram pumah Vending machine 817 pek chhuah tum anih thu a sawi bawk.