Misual kut-a thi hriatrengna lungphun hawng

Kum 1990-a Siaha District chhung Noaotla khaw dai-a misual kut tuara Excise Force thi te hriatrengna lungphun hi Excise & Narcotics Minister Dr. K. Beichhua chuan niminpiah khan a hawng.

October 9, 1990 khan Excise & Narcotics S.I. Lalchungnunga leh Constable Hmangaihzuala te chuan ruihhlo (opium) tawlhru thinte man tumin Noaotla khaw daiah inhmu turin an inrem a, an inbiakna kalsualah ruihhlo tawlhrutute chuan Excise mi pahnih hi chemte in vithlumin an tlanbo zui a, heng mite hriatrengna lungphun niminpiah-a hawnna ah hian Dr. K. Beichhua chuan mihring te hi thih dan hrang hranga la thi vek tur kan ni tih sawiin, heng ah hian ram leh hnam tana thihna tluka ropui a awm lo tih a sawi a. “He thihna tuartute hian ‘Ruihhlo do kawngah Zoram mipuite hi kan hmabak lo chhunzawm ve tawh rawh u’ tiin helai hmun atang hian min au a ni,” a ti. He Lungphun hawnna inkhawm hi Excise & Narcotics Department Asst. Commissioner Peter Zohmingthanga chuan a kaihruai a ni.