CM chhuichian tir turin ngen

Tunhnai lawka din thar, Mizoram First chuan Lengpui Airport tihchangtlun hna (contract) inpek chungchangah dan bawhchhiatna awm ngei nia a lan avangin nimin khan Mizoram Lokayukta-ah an zualko a, heta mawhphurtu Chief Minister chu Finance leh Audit lama mi thiamte chhui chiantir ngei turin a ngen.

Hemi chungchangah thuchhuah an siamah Mizoram First te chuan Chief Minister leh PWD Minister ni bawk Zo-ramthanga chu thuneihna hman khawloh vangte, chhungkhat laina duhsak uchuak avangte, India Danpui Article 14 bawhchhiat avang te, General Financial Rules (GFR) 2017-a Rule 162-na leh Vigilance Commission thuchhuah hrang hrangte bawhchhiat avangin Prevention of Corruption Act, 1988 hnuaiah thubuai siamsak turin Mizoram Lokayukta-ah an thlen tih an sawi a ni.

Hei bakah hian Lengpui Airport tih-changtlunna hnathawh hi M/s Zoramchhana leh M/s KR Construction (a neitu Kamlova Chhangte/Kamrul Islam Laskar) te hnenah Restricted Tender hmanga pek a ni tih pawh sawiin, he Restricted Tender hman a nih danah hian dan bawh-chhiatna a awm ngei nia an hriat thu an sawi a. General Financial Rules 2017 leh The Mizoram Public Procurement Rules, 2020 in a sawi dan chuan cheng nuai 25 chin chung lama Restricted Tender ko tur chuan chhan mumal tak awm tur a nih thu leh Restricted Tender hman a nih dawn chuan hman ngei a tul chhan chiang takin ziak a awm tur a nih bakah a chhang turin mi pathum aia tam an awm ngei tur a ni bawk tih an tarlang a. Heng zinga thenkhat hi zawm a ni lo tih an sawi a ni.

Dan bawhchhiatna leh dan palzama mi hmai eng pawh zah lova induhsakna uchuak (nepotism) hi Mizoram leh hnam zahlohna anih avangin Mizoram First chuan an dodal tih sawiin, hetiang thil do turin Zofate zawng zawng chu an sawm tih an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar