Party dang buaina ah kan buai ve lo - ZPM Leader

Zonuna Kawlni (LENKAWL) • April 6, 2022 • Comments • Mizoram

ZPM Leader Lalduhoma chuan an Party chu party dang duhdan ni lovin an Party Constitution ang zelin an kal dawn tih a sawi a, “Party dang buaina ah hian kan buai ve lo,” a ti.

ZPM Zemabawk Local Council Member thlan thar lawmna hun LT Firm, Beraw lui-a nimin-a neih a hmanpuina ah he thu hi sawiin ZPM Leader Lalduhoma chuan ZPM a din khan Party dang ten thil hrang hrangah an buai an ring hle tih sawiin, “An rin loh ang takin tunah hian inpumkhatna tha tak hnuaiah kan kal mek a ni,” a ti a. “Party dangte kan party chungchangah an buai hle a, a chhunga awmte erawh chuan buaina kan nei lo a ni. A tu nge thu ber tih velah hian ZPM chu a buai lova, party dang ZPM sawrkar hlau ngawih ngawih te an buai mai zawk a ni. Collective Leadership hi a takin kan hmang mek a, buaina a awm lo mai ni lovin kan phur thar deuh deuh a ni,” a ti bawk.

ZPM Leader chuan Ruling Party lo kal tawh reng reng an hnathawh a tha lo em em zel tih sawiin, “ZPM MLA te hnathawh chu bial tinah a tha bik a, a daihzai bik a, hei hian kalphung thar kan zawrh mek chu a taka thleng thei a ni tih a tarlang nghal a. ZPM VC/Local Council neihna Veng leh khua reng rengah hna tha taka thawh a ni zel mai hian min tilawm hle a, hna tha thawk zel turin i tang zel ang u. Opposition lama la awm rih kan nih pawhin opposition tangkai nih i tum zel ang u,” a ti bawk.