COVID-19 hri kai 175 hmuhchhuah belh leh an ni

Zonuna Kawlni (LENKAWL) • April 6, 2022 • Comments • Mizoram

Mizoram-ah niminpiah khan Sample 1067 enfiah niin COVID-19 hri kai mi 175 hmuh belh leh an ni a, Sample enfiah atanga chhutin za zela 16.4 te chuan hri an kai a ni.

Niminpiah khan ZMC-a RT-PCR Laboratory-ah Sample 15 enfiah niin hri kai mi pahnih hmuh an ni a, Lunglei-a RT-PCR Laboratory-ah Sample enfiah awm lovin Fluorescent Immunoassay Test hmangin Serchhip District-ah Sample 18 enfiah niin hri mi pathum hmuh niin Thenzawl vek an ni bawk. District hrang hranga TrueNat Laboratory zingah Serchhip-ah Sample pathum enfiah niin hri kai hmuh an awm lo bawk a ni.

Rapid Antigen Test hmangin niminpiah khan Sample 1031 enfiah niin hri kai mi 170 hmuhchhuah an ni bawk a, Lunglei District-ah hri kai mi 60 hmuh niin Serchhip District-ah 40, Saitual District-ah 19, Hnahthial District-ah 17, Mamit District-ah 16, Aizawl District-ah 10, Champhai District-ah 7 leh Lawngtlai District-ah hri kai mi pakhat hmuh an ni bawk.

Nimin khan Mizoram-ah hri kai enkawl dam mi 188 awm belh lehin heti hian Mizoram-a hri kai hmuh tawh zawng zawng chu 2,24,963 an ni a, an zinga 2,23,513 te chu enkawl dam ni tawhin hri kai hmuh te atanga za zela 99.35 te chu enkawl dam an ni tawh a, hri kai enkawllai 763 la awmin hri kai zingah mi 687 an boral tawh bawk a ni.