Niminpiah-ah COVID-19 hri kai 149 hmuh belh

Niminpiah khan Mizoram-ah Sample 1173 enfiah niin COVID-19 hri kai mi 149 hmuh belh leh an ni a, Sample enfiah atanga chhutin za zela 12.70 te chuan hri an kai a ni.

Niminpiah a Mizoram-a hri kai hmuh 149 zinga 147 te hi Rapid Antigen Test hmanga hri kai hmuhchhuah an ni a, Lunglei District-ah hri kai mi 32 hmuh niin Serchhip District-ah 29, Mamit District-ah 24, Aizawl District-ah 21, Saitual District-ah 20, Khawzawl District-ah 11, Champhai District-ah 7, Siaha District-ah mi 2 leh Hnahthial District-ah mi pakhat te an ni. Heng bakah hian Fluorescent Immunoassay Test hmangin Serchhip District-ah Sample 19 enfiah niin hri kai mi pahnih hmuh an ni bawk a, Thenzawl khua ve ve an ni.

Niminpiah khan ZMC-a RT-PCR Laboratory-ah Sample 18 enfiah niin hri kai hmuhchhuah an awm lova, District hrang hranga TrueNat Laboratory zingah Lunglei leh Saitual District atangin Sample 6 enfiah niin hri kai hmuhchhuah an awm lo bawk a ni.

Nimin khan Mizoram-ah COVID-19 hri kai enkawl dam mi 194 an awm belh ve leh a, heti hian nimin tlai thleng khan Mizoram-a hri kai hmuhchhuah tawh chu 2,25,732 niin an zinga 2,24,409 chu enkawl dam an ni tawh a, hri kai atanga chhutin za zela 99.41 te enkawl dam an ni tawh a, hri kai enkawllai 634 la awmin hri kai zingah mi 689 an boral tawh bawk a ni.