MPCC in thu diklo sawi ah ZR. Thiamsanga puh

Mizoram Pradesh Congress Committee (MPCC) chuan Health & Family Welfare Board-a Vice Chairman Dr. ZR Thiamsanga MLA chu thu diklo sawi ah an puh.

Nimin a thuchhuah an siamah MPCC Media Department chuan April 8, 2022 khan Mizo Hnam Run-ah Dr. ZR. Thiamsanga hian “Mizoram State Healthcare hi MNF bul tan a ni a, Party dangin sawi tur an nei lo. La sawrkar ve lo party phei chuan sawi tur an nei lo” tiin a sawi tih tarlangin, “MSHCS hi MNF duanchhuah a nih avanga midangin sawi tur kan nei dawn lo a nih chuan, COVID-19 hri leng kara an hman tangkai em em Medical College leh Lengpui Airport te hi eng sawrkar siam nge tih lo ngaihtuah nawn leh se kan duh hle,” tiin Dr. ZR Thiamsanga chu hmeichhe enkawl thiam bik Doctor lar tak a ni a, hetiang thu buluk deuh sawi tura an lo ngaih loh zinga mi a nih avangin mak an ti hle tih an sawi a ni.

Mizoram Healthcare Scheme bultantu chu MNF sawrkar a ni tih MPCC chuan sawiin, “Amaherawhchu, kalphung felfai zawka siamthatu leh a taka kalpuitu chu Congress sawrkar a ni tih hretu chu Mizoram mipui an ni. Health Care System fel tak awm sa, tuna tichhe leh vektu leh leiba vaibelchhe tam tak siamtu chu MNF sawrkar bawk a ni,” tiin “Healthcare chungchangah chauh lo pawh Mizoram Politics-ah hian MNF hi ti chhetu an ni a, Congress hi MNF tihchhiat siamthatu kan ni zel a ni,” an ti.

“MSHCS bultan nan a tirah Sum bawmpui (Corpus Fund) siam a ni a, cheng vbc. 50 dah nghal a ni,” tia Dr. ZR. Thiamsanga sawi chu RTI zawhna chhanna atangin thu dik lo a ni tih chiang takin a lang tih MPCC chuan sawi bawkin, “Finance Department-in April 5, 2022-a RTI zawhna an chhan danin ‘MSHCS Corpus Fund hi ADB Project Mizoram Public Resource Management hnuaia Health Sector Improvement peng pakhat a ni a, hetah hian Health Corpus Fund atan Rs. 117.80 crore dah a ni,” a ti a, Corpus Fund dah kum pawh Congress sawrkar hnu, kum 2010-ah a ni. Dr. Thiamsanga sawi cheng vbc. 50 hi chu Corpus Fund ni lovin, MNF Vice President atanga an paihthlak tak Pu R. Tlanghmingthanga fate hminga an thawhna Bajaj Allianz-a an dah pun zawk kha a ni,” an ti a. “Kum pangngai nise Healthcare bill ba kan nei lo ang,” tia Dr. ZR. Thiamsanga sawi pawh thu dik lo hmanga mipui hruai sual tumna nia sawiin, “COVID-19 avanga kan buai chhung zawng pawh khan Corpus Fund pung, cheng Vbc. 4 hi Finance Department-in quarter tin a pechhuak zat zat reng a, hei hi COVID-19 hri len hma pawha a pek zat tho a ni. Chuvangin, Healthcare Fund buaina hi COVID-19 nen a inkaih-hnawih lo a, COVID-19 vangin Healthcare sum hmuh a tlahniam miah lo bawk,” an ti a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar