MNF President in kan vanneihna a lang niin a sawi

MNF President leh Chief Minister Zoramthanga chuan Zu zuar sawrkar kan hrawn lova kan vanneihzia hi hripui lo leng hian a tilang tih a sawi.

Serlui North Block MNF Conference leh mithar lawmluhna hun nimin-a Vairengte Field veng Multipurpose Hall a neih a hmanpuina ah he thu hi sawiin MNF President Zoramthanga chuan hripui leng leh ramri buai karah pawh Buhfai leh Gas-ah harsatna awm lovin tun hi kan thleng thei tih sawiin, Kawngpui pawh hun hmasaa chhe em em vek mai kha, tunah chuan a tha deuh vek ta mai tih a sawi a, “Kum 60 chhung min hruaitu kan Pathian hian hun harsa ah pawh he ram hruai tur hian min dah a lo ni. MNF hi lo sawrkar lo hlauh ta ila, tun dinhmunah hian kan ram hi a ngaihtuahawm ngawtin a rinawm,” a ti a ni.

MNF President chuan inthlanpui kan hmachhawn leh turah pawh tun aia tam zawk hruaitu neiin MNF chu a sawrkar leh ang tih sawiin, “Varparh Arsi hi a eng zual zel ang a, dona chi hrang hrang leh nekchepna hrang hrang karah min hruai tlattu kan Pathian min hruaina hi kan rinchhan tlat a, nun nel tak nei a, amah kan en tlat a nih chuan hlawhlinna nasa zawk kan chang zel dawn,” a ti a. “MNF hi hnam rilru pu kan ni a, kan chhungkua ah hian tumah a hlui leh a thar kan awm bik lo a, a neitu vek kan ni, rilru nghet puin tan ila thar theuh ang u,” tiin an Party mipuite chu a fuih a, “Nakum-ah ZPM emaw Congress emaw an sawrkar loh chuan cheng nuai nga emaw, a aia tam pawh chawi turin oppostion-te hi dahkham ngam an awmin a rinawm hauh loh,” a ti bawk. MNF thuchhuah tarlan danin he hunah hian Phaisen, Phainuam, Saihapui leh Vairengte North leh South atangin mi thar 598-te chu MNF-ah lawmluh an ni.