Mizoram-a kawlphetha tam zawk siam chungchang Governor leh Chief Minister in an sawidun

Mizoram chhunga Kawlpetha tam zawk siamchhuah dan tur chungchang leh thil pawimawh dang te chu nimin khan Raj Bhavan-ah Governor Hari Babu Kambhampati leh Chief Minister Zoramthanga te chuan an sawidun a, he hunah hian P&E Minister R. Lalzirliana pawh telin thil pawimawh dang te pawh an sawidun nghal bawk a ni.

He inkawmna ah hian Governor Hari Babu Kambhampati chuan tunhnaiah Mizoram sawrkar hmalakna umzui ngai nia a hriat te bawhzuiin Delhi-ah Central Sawrkar a Minister pawimawh tak tak te a dawr thu Chief Minister Zoramthanga hnenah hian sawiin, Central Sawrkar lam pawhin Mizoram sawrkar hmalakna te chu an ngai pawimawh hle nia a hriat thu a sawi a. Chief Minister Zoramthanga pawhin Governor-in a remhriatna leh tha a tih anga thahnem ngai taka Central sawrkar hotute a bia chu lawmawm a tih thu a sawi a. Tuna Mizoram sawrkar hmalakna pawimawh zual te Governor hi a hrilh nghal bawk a.

Hemi hnu hian Mizoram hmasawnna tura hmachhawp te leh tuna hmalakna kal mek pawimawh te an sawidun a, heng zingah hian Power Sector-ah hmalakna liantham deuh kalpui a, tuiluang leh nizung chakna hmanga Kawlpetha tam zawk leh State khamkhawp tur siamchhuah chungchang, Project senso hmuh theih dan leh a kaihhnawih dangte uluk takin an sawi a. Hemi chungchangah hian Power Minister R. Lalzirliana pawhin P&E Department Engineer ten chiang zawk zirchianna an nei theih tur thu te, Mizoram chhunga lui luang chakna leh nizung chakna hmanga Kawlpetha siamchhuah theih zat chhut-chhuah sa te bakah heng project siamna atan thil tul te a sawi bawk a ni.

He hunah hian Tourism Sector tih hmasawnna a tul chungchang te, Thlawhna hmanga inkal-pawhna tih hmasawn chungchangte, Higher Education bika Science zirna tih phuisui dan tur te, Mizo pi leh pute atanga ramhmul damdawi kan lo hman than te Ayush huanga sengluh dan tur te sawi a ni a. Central Sawrkar Schemes tam tak mipui tam zawkin in an hriatchiana, hamthatna an dawn theihna tur hmalak ngai te pawh an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar