District Hospital tura ram pek enfiah a ni
Serchhip District Hospital building sakna tura tlawmngai pawl leh VC in Bukpui ram an ruahman enfiah tur hian Aizawl lam atangin Health Department-a Joint Director PC. Lalramliana chu lehlanga rawn kalin helai hmun hi damdawi In lian zawk sakna atan a rem leh rem loh te leh Hospital lian leh kaihhnawih sakna atan a hmun a zau tawk em tih enfiah a ni a, Bukpui M/S awmna thin zawl atanga enfiah a nih hnuah Drone hmangin a ram dinhmun te en a ni a, ke in engemaw chen an fangkual bawk a, heta a thil hmuh dan hi thuneitu sang zawk hnenah thlen leh tur a ni dawn a ni.
Nimin a Bukpui ram enfiahtu Health Department-a Joint Director hi Serchhip atangin Chief Medical Officer Dr. Lalzawmi leh District Medical Superintendent Dr. ZD. Lalmuanawma te chuan an lo tawiawm a, anni bakah hian a bula ram neitu P&E Department atangin Serchhip-a EE Er. Laltlanthanga pawh he hunah hian telin helai ram neitu Chhiahtlang South VC te pawh an tel a, Chhiahtlang South VC te hi ITI nena ramri ah leh P&E Department nena ramri-ah signboard lo tar tura tih an ni tih kan thudawnna chuan sawiin, tun atanga reilote ah hmalak thuai beisei a ni tih kan thudawnna chuan a sawi bawk.