Kuthnathawktute ngai pawimawh ber dawn tih sawi

ZPM Leader Lalduhoma chuan, “ZPM chuan kuthnathawktute hi kan ngai pawimawh ber a, kuthnathawktuten lei rem kan rah ve phawt dan tur kan ngaihtuah dawn,” a ti.

Nizan hmasa a Ngopa Zawlbuk-a Vantlang Inkhawm-ah ZPM Leader Lalduhoma hian Sawrkar awm tawhah kuthnathawktute an beidawn thu sawiin, “Kan sawrkar hrawn mek leh hrawn tawh ten kuthnathawktute tan ruahmanna nei ve thin bawk mah se, a Project a mumal loh avang leh a market lam an ngaihsak leh si loh avangin mipuite min ti beidawng fova, a thawk tam leh a thar chhuak tam apiang ten dah tawih tur kan ngah ting mai a ni,” a ti a. ZPM chuan kuthnathawktute an ngai pawimawh ber tih sawiin, “Kuthnathawktu ten lei rem kan rah ve phawt dan tur kan ngaihtuah dawn a. Chumi tur chuan Sawhthing pawh Kg-ah Rs. 50 in kan lei dawn a ni,” a ti a. “Chutianga lei rem kan rah hnuah a tahtawl te tein eizawnna ngelnghet zawk kan siam chho zel dawn a ni. Chuvangin Sawhthing te pawh tun atangin a chi tur in lo ngaihtuah lawk a ngai dawn a ni,” a ti bawk.

ZPM chuan nasa taka beihna an tawh thu pawh ZPM Leader chuan sawiin, “ZPM hi a lo din khan pawl paruk inchhungkhawm kan ni a, miten an inlungrual thei lovang, Symbol-ah an buai ang, Flag-ah an buai ang, Party hmingah an buai ang, President-ah an buai ang, Chief Minister-ah an buai ang, min ti a, pakhatah mah kan buai lo a, kan party anga inlungrual leh tangrual an awm lo a ni,” a ti bawk.