Department thenkhat MIC-a inlan turin koh an ni

Mipuiin awlsam zawka Public Authority/Department te hnathawh an hriatna tur point 17 an website-a tarlang lo Department thenkhat te chu nimin khan Mizoram Information Commission (MIC)-ah inlan tura koh an ni.

Hemi chungchanga Mizoram Information Commission in nimin a thuchhuah siama a tarlan danin RTI Act, 2005 Section 4 (1)(b) chuan Public Authority/Department te chu an hnathawhna chungchang mipuiin awlsam zawka an hriat theihna tur point 17 tarlangin, an Office Website-ah theuh dah ngei turin a lo hriattir tawh a. Hemi bawhzui nan hian MIC chuan January 19, 2022 khan order a tichhuak a, Office hrang hranga Departmental Appellate Authority (DAA) leh State Public Information Officer (SPIO) te chu RTI Act, 205 Section 4 (1)(b) in a phut angin Suo Moto disclosure ti vek tur leh Februay 28, 2022 aia tlai lovah an hmalakna te Secretary, MIC hnena thehlut turin a hriattir a. Mizoram Chief Secretary pawh order copy pek niin sawrkar Department ten an zawm ngei em tih loh hriatpui tura ngen a ni bawk.

MIC thuchhuah tarlan danin Office 130 chuang hnenah he Order hi semchhuah a nih laiin Office 40 chauhin an hmalakna an thehlut a, a thehlut ve lo zinga Department lian zual 10 te chu MIC-ah inlan tura hriattir an nih angin nimin khan Lalnunmawia Chuaungo, Chief Information Commissioner leh Zorammawia, Information Commissioner te hmaah an inlan a. Head of Department leh SPIO te chu RTI Act Section 4 (1) (b) in a phut angin mipuiin zawh kher ngai lova an Department hmalakna leh an hnathawh chungchang an website-ah dahchhuak ngei tura hriattir an ni. Harsatna an neih pawhin inthlahrung lova Mizoram Information Commission be rawn turin an chah a, an website-ah an dah ngei em tih MIC chuan a endik zui zel dawn tih hriattir an ni bawk.