Hri laka zirlaite himna tur SOP duan tha tawkah ngai

Mizoram State Commission for Protection of Child Rights Chairman Dr. C. Lalsangzuala chuan zirna In hawn tan turah zirlaite himna chu Child Rights Commission in a ngaih pawimawh thu sawiin, School Education Department in SOP a duan chu Commission in ngun taka a zirchian hnuah tha tawkah a ngai tih a sawi.

Kar kalta a thuthar thehdarhtute a kawmna ah Dr. Lalsangzuala chuan hri lengin ziaawm lam a pan hnua zirna In hawn thar turah zirlaite himna an ngai pawimawh tih hi sawiin, naupangte hamthatna tur leh an dikna chanvo humhalhna kawnga dan dinglaite leh sawrkar policy te enzui chu an mawhphurhna a anih thu a sawi a. An zirchianna ah Mizoram chhunga zirna In chu a tlangpuiin tha thawkhat mahse hmasawnna tur tam tak ala awm tih a sawi a, kum 2019 January thla a zirlai awmna Hostel hrang hrang leh School Canteen te zirlai te tan a him tawk em tih an endikna ah School an endik zawng zawng chuan Guidelines an pha lo vek tih a sawi a, Central atanga Guidelines anih avangin zawm vek harsa mahse Mizoram chhunga Hostel leh Canteen te chu zirlai naupang te himna turin tan an lak a ngai a ti.

An endikna ah School building an endik te chu zirna In sang lam aiin hniam lamah naupangte tan a himlo zel tih sawiin, kangmei leh chhiatrupna thleng palh thei laka himna ah hmasawn ala ngai hle tih a sawi a, Hostel thenkhat inthiarna felfai lo leh tawt lutuk a awm thu a sawi bawk. Dr. Lalsangzuala chuan kum 2 lai zirna chawlhsan anih tawh avangin School hawn thut turah pawh naupangte himna mai bakah an rilru himna a pawimawh hle dawn tih a sawi a, zirtirtu leh Nu leh pa te pawhin dimdawi tak leh fimkhur taka zirtirna kalpui a pawimawh tih a sawi bawk.