Hri kai 101 hmuh belhin mi 143 enkawl dam an ni

Mizoram-ah ni khat-a COVID-19 hri kai hmuhchhuah an tlem  ve zel a, niminpiah khan Sample 738 enfiah niin heng atang hian hri kai mi 101 hmuhchhuah an ni a, Sample enfiah atanga chhutin za zela 13.69 te chuan hri an kai a ni.

Niminpiah-a Mizoram-a hri kai hmuhchhuah 101 zinga 98 te hi Rapid Antigen Test hmanga Sample enfiah 709 atanga hmuh te an ni a, Lunglei District-ah hri kai mi 30 hmuh niin Serchhip District-ah 19, Aizawl District-ah 12, Saitual District-ah 10, Kolasib, Hnahthial leh Mamit District-ah 7 theuh, Lawngtlai District-ah 3, Khawzawl District-ah mi pahnih leh Siaha District-ah hri kai mi pakhat hmuh an ni.

Heng bakah hian Fluorescent Immunoassay Test hmangin Serchhip District-ah Sample 17 enfiah niin hri kai mi pahnih hmuh an ni bawk a, District hrang hranga TrueNat Laboratory zingah Serchhip-ah Sample 3 leh Hnahthial-ah pakhat enfiah niin Serchhip District-ah hri kai mi pakhat hmuh a ni a, ZMC-a RT-PCR Laboratory-ah Sample 8 enfiah niin hri kai hmuhchhuah an awm lo thung a ni.

Mizoram-ah COVID-19 hri kai enkawl dam pawh pung ve zelin nimin khan hri kai enkawl dam mi 143 an awm belh leh a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,25,213 niin an zinga 2,23,813 te chu enkawl dam an ni tawh a, hei hi hri kai hmuhchhuah atanga chhutin zaa 99.38 niin hri kai enkawllai 713 an la awm mek a, hri kai zingah mi 687 an boral tawh a ni.