Governor in Mizo mipuite hawihawm an ni tih a sawi

Mizoram Governor Hari Babu Kambhampati chuan Mizo mipuite chu mi hawihawm tak, khualzinte duat thiam leh remna leh muanna ngaina tak an ni tih a sawi.

North East on Wheels Expedition neih meka Team pakhat, Saza - Serow Team te chuan Jampui Tlang, Tripura atangin Nilaini khan Aizawl rawn thlengin Governor hian thingpui ruai a lo buatsaih sak a, he hunah hian Governor Hari Babu Kambhampati chuan India ram hmun hrang hrang atanga Bike khalha Mizoram rawn thleng te chu Mizoram-ah hun hlimawm tak hmang turin a lo lawm a. Mizoram ah State pawn lam mite la hmuh ngaih loh hmun mawi tak tak, Mizo khawtlang nun entawntlak tak tak te leh sik leh sa nuam em em te chu pawnlam mi te tana rawn zin nawn leh na tham a ni, a ti a. Mizo mipuite chu mi hawihawm tak, khualzinte duat thiam leh remna leh muanna ngaina tak an ni tih pawh sawiin, tun programme avanga Mizoram rawn tlawhtute pawh pawnlam mite tana Mizoram chungchang sawihawngtu an nih ngei a beisei tih a sawi bawk.

Amazing Namaste Foundation ten India zalenna kum 75-na puala an buatsaih North East on Wheels Expedition-ah hian mi 75 an tel a, Team 6-ah insiamin NE State an fang dawn a, Mizo thalaite pawh telin Mizoram-ah chuan Aizawl, Thenzawl leh Vairengte-ah hun hman a ni ang.