Four lane sial tur atan hnathawktu inpeih tan tawh

Mizoram-in a ruala lirthei pali (4) tlan theihna tura a zau kawngpui, Four-Lane Highway a neih hmasak ber tur National Highways & Infrastructure Development Corporation Ltd. (NHIDCL) hnuaia Vairengte atanga Sairang thleng Four-lane kawngpui sial tura hmalakna kal mekah a taka hna tan theih la ni chiah lo mah se, he kawngpui sial hna thawktu tur Contractor te chuan hna tan turin an inpeih tawh tih an sawi.

He Four-lane kawngpui sial tur hi Silchar atanga Sairang thleng tur a ni a, hemi inkar hi then ruk-ah then a ni a, then khatna leh hnihna chu Assam State a Cachar District chhungin a huam a. Vairengte leh Sairang inkar bik hi then thumna, lina, ngana leh rukna-ah then a ni thung.

NHIDCL chuan he hna thawh tur atan hian Contractor a thlang fel tawh a, Vairengte atanga N. Chhimluang kawnga thawk tur hian Haryana a hmunpui nei Dhatarwal Constructions Pvt. Company thlan an ni a. Heng mite hian hna tan theih a nih veleh a tan thei turin Vairengte Chitephai-ah awmhmun an khuar a, Lei laihna khawl leh kawng siamna khawl chi hrang hrang an inchhawp tawh a. Heng bakah hian leivung paihna tur Tipper pawh a tul huna hman mai tur 40 chhawp a ni tawh bawk. 

Hetihlai hian, he kawngpui sialin ram a tihchhiat tura ram neitute zangnadawmna pek tur chungchangah Kolasib District Administration chuan then 3-na leh lina bikah an tih tur an tihfel tawh thu an sawi a. A bak chu NHIDCL kutah a awm tawh niin an sawi a. Then ngana leh rukna pawh a tul angin thil tul leh pawimawh buaipui zel a nih tur thu District thuneitute chuan an sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man