Serchhip-a Excise & Narcotics Department ten an Zu man sa litre 800 chuang an tichhia
Serchhip-a Excise & Narcotics Department chuan kumin March thla leh April thla chhunga Rakzu an man litre 800 chuang zet chu Court remtihna in nimin khan Serchhip P&E Veng-a Leisekawt mual sir-ah an leihbua a, heng te hi cheng nuai hnih chuang hu nia chhut a ni.
Serchhip-a Asst Commissioner, Excise & Narcotics Department B. Ngurchhuana chuan heng Zu an tihchhiat tur chungchang hi nimin khan a Office-ah tualchhunga thuthar thehdarhtute kawmin heng Zu te hi kumin March thla leh April thla-a man te a ni tih sawiin, tunhnai a tum thum an man leh Court a thubuai chinfel tawh tihral tura tihte an ni tih a sawi a, heng Zu te hi Phunchawng atanga rawn phurh chhoh a ni tlangpui tih sawiin, Serchhip, Thenzawl, Keitum leh Mualthuam lama tihral turte an ni a, hemi kaihnawih ah hian mi 4 leh lirthei 3 man an nih thu a sawi a ni.
END-a Asst Commissioner chuan Department lam leh YMA te thawhhona a that avangin heti zat hi an man thei tih sawiin, YMA te nena an thawhona ah lawmthu a sawi a, nikum kumtawp lama an lo man tawh thenkhat te chu Court-ah tihral alo ni tawh tih a sawi bawk a. An Department chuan Serchhip District-a khaw hrang hrangte tlawhchhuaka Awareness Campaign a tam thei ang ber buatsaih an tum thu sawiin, amaherawh chu hri leng avangin an la tih vek theih loh thu leh an theih ang anga hma an lak chhoh mek thu a sawi bawk a. Kum naupang zawk ten Zu leh ruihtheih thil an tihchhin loh nan inzirtirna nasa zawka neih a tul thu pawh a sawi bawk.
Heng bakah hian mipui thawhpuina an mamawh thu pawh B. Ngurchhuana chuan sawi langin, Zu leh ruihhlo dona kawngah mipuiten tha taka an thawhpui chuan an tha nasa takin a tichak tih a sawi a, mipuite hnen atanga report an dawn te chu chak taka umzui zel an inpeih thu leh anmahni Department-ah thawktu an tlem avanga harsatna an tawh te pawh a swilang bawk a ni.
Serchhip-a Excise & Narcotics Department hian kumin chhung khan ruihhlo Heroin gram 308.24 leh Ganja kg 8.63 zet an man tawh tih a sawi bawk.
Nimin-a Leisekawt Mual sir-a END ten Zu an leihbuakna hun hi tualchhunga thuthar theh-darhtu ten a hmunah an telpui a ni.