Champhai DC in Department hotute a kawm

Champhai District Bawrhsap thar James Lalrinchhana chuan nimin khan Champhai District enkawltu Sawrkar Department hrang hrang hotute chu DC Conference Hall-ah inhmelhriattirna leh inkawmna hun a hmanpui a, he hunah hian Bawrhsap chuan Sawrkar Department hrang hrang hotute chu an tawnhriat leh remhriatna neihte District leh a chhunga chengte tihhmasawn nana chhawr tangkai thiam tura chahin, tun hmaa District lian tak ni thin Champhai District thendarh a nih tak avangin hneh zawk leh hun tam zawk pe chunga enkawl thei tura tan la sauh sauh turin a fuih a. District Administration kengkawhtu ber DC Office chu dawr hrehlo tur leh harsatna leh mamawh an neihte thlen nana hmang thin tura sawmin, thawhhona a that phawt chuan District leh mipuiten an hlawkpui dawn a ni, a ti bawk.