Khawvel hmasawnna kal chak tak karah hmathlir tha tak neih a pawimawh - Chief Minister

Chief Minister Zoramthanga chuan khawvel hmasawnna kal chak tak karah hmathlir tha tak neih a pawimawh thu a sawi.

Govt. Zirtiri Residential Science College building thar hawnna leh NAAC Grade 'A' Accreditation lawmna inkhawm nimin-a GZRSC Durtlang campus a buatsaih khuallian nia a hmanpuina ah he thu hi sawiin Chief Minister chuan “Vawiin-a tha leh pawimawh a kan hriatte hi kum sawm hnu lamah chuan a danglam vek thei tih hriain, kan thiamna leh theihna te hi a hun mil zela tangkaia kan hman thiam theih nan hmathlir tha tak neih thiam a pawimawh,” a ti a. Chief Minister chuan Mizoram in resource tha a neih te hman tangkai thiam pawimawh a tih thu sawiin, College zirlaite chu an thiamna hmang tangkai tura a fuih bakah hlawhtling tur chuan tumruhna a pawimawh tih hre reng turin a chah bawk a ni.

He hunah hian khual zahawm leh Higher & Technical Education Minister Dr. R. Lalthangliana chuan GZRSC in NAAC Accreditation-ah Grade tha tak an hmu chu a lawmpui thu sawiin, hemi ah hian duhtawk mai lova, kum 2027-a Assessment an hmachhawn leh turah tuna Grade 'A' an hmuh aia sang hmuh tum turin a fuih bawk. Higher & Technical Minister chuan Mizoram-ah zirna quality tha kan mamawh thu sawiin, sawrkar pawhin zirna a ngaihpawimawh thu a sawi a. Zirna In sang tam zawk din a, a awm sa te thuamthat chu sawrkarin a theih chin chinah tih zel a tum thu a sawi a, Mizoram zirlaite chu hnam dang zirlaite aia thleng sang thei lo bik an nih loh thu pawh a sawi bawk a ni.

GZRSC Durtlang Campus building thar Chief Minister in a hawn tak hian Academic & Administrative Building Block (Block-2) te, Academic building Block (Block-3) bakah Car Parking leh Canteen te a huam tel a. Building sakna hi sum hnar hrang hrang - DoNER, RUSA leh state sawrkar atang te a hmuh niin thawktute thawhkhawm, a vaiin cheng nuai 19 hmanga sak a awm bawk. Block-2 sak nan hian cheng nuai 650 hman niin chhawng li (room 24) a awm a. Block-3 hi cheng nuai 194 a sak niin RUSA 2.0 atanga sum hmuh cheng nuai 180 hmanga chhawng hnih (room 5 awmna) sak a nih bakah faculty-te sum thawhkhawm cheng nuai 14 hmangin basement floor pali siam a ni bawk. Car Parking leh Canteen te hi cheng nuai 12 leh nuai 5 (faculty contribution) a sak niin, chhawng hnih ve ve a awm a ni. Heng bakah hian he College-ah hian Library building, Girls Hostel leh Boys Hostel bakah Home Science building a awm bawk.