Auditorium cheithat leh bungraw senghawi hna thawk
Serchhip Sub-Hqrs. YMA chuan Inrinni khan Town pum huap hnatlangpui neiin Serchhip Auditorium-a bungraw chhia senghawi leh siamthat hna an thawk.
Tunhnaiah Serchhip Auditorium chhunga bungraw thenkhat te nasa taka suasam a nih avanga hmalakna kal zelah Inrinni khan Serchhip Sub-Hqrs. YMA hmalakna in Town chhunga YMA Branch hrang hrang ten hnatlangpui an nei a, he hnatlang ah hian Auditorium chhung suasamna a bungraw chhia te seng-hawiin a bul vela hnim te thenfai a ni a, hei bakah hian a chhung hmun hrang hrangte thenfai niin Stage chhuat chhia te pawh thiatin siamthat tura ruahman a ni a, he hnatlang ah hian mi 100 vel thawkin Serchhip Sub-Hqrs. YMA hian tun thla tawp lam hian Serchhip Auditorium hi Rorel Inkhawm neihna atan hman an tum a ni.
He hnatlang hi UD&PA Department atangin District Urban Development Officer Lalthanghliri Pautu leh a thawhpui te pawhin an telpui a, hnatlang te mamawh tur bungrua chi hrang hrang leh lirthei bakah ei leh in an tum sak bawk a, tun tuma hnatlang bakah hian Auditorium cheitha turin hmalak zel a ni dawn tih an sawi a, tunah hian a bang darthlalang thenkhat keh te pawh thlak tura chah mek niin hun reilote ah hman theih tura peih leh theih beisei a ni.