ZPM-in Lokayukta-a an thu thlen Governor an sawipui

ZPM hruaitute chuan nimin khan Mizoram Governor kawmin Mizoram Assembly Speaker Lalrinliana Sailo chungchanga Lokayukta a lehkha an thehluh chak zawka bawhzui a nih theih nan leh Mizoram dinhmun an sawipui.

ZPM hian PMGSY hnuaia Khawzawl – Ngaizawl kawng siam chungchanga Mizoram Assembly Speaker Lalrinliana’n dan kalha mi hming hawha contract hna a lo thawk anga lang leh hemi denchhena cheng nuai 100 lai a lo fanghmano ei anga thuthang chungchang bawhzuiin Feb. 23, 2022 khan Mizoram Lokayukta-ah hian complaint an lo thehlut tawh a. Central YMA in Mizoram PWD nena MoU an ziak anga endik hna an report-naah hnathawktu (contractor) hmingah Lalrinliana Sailo hming hi hmun 2-ah a lo lang tawh bawk tih hemi chungchanga nimin a thuchhuah an siamah tarlangin, hei hian RP Act 1951 Section 9A-in a sawi angin MLA atangin disqualified theih a nih thu leh Lokayukta thuam chaka complaint hi chak zawka chhui turin Governor hi an sawipui tih an thuchhuah ah chuan an tarlang.

Hei bakah hian ZPM hruaitute chuan Mizoram sawrkar hnuaia dan leh thupek-in awmzia a neih lohzia te, dan phal loh thil smuggling hluar lutuk chungchang leh ramri buaina bakah Chief Minister-in budget pharh zawha Press Meet a neihnaah Contractor ni lo contract hnathawh leh Restricted Tender hmanga duhsak zawng hna inpek chu kalphung pangngai ang maia kalpui a nih thu a sawite chu Mizoram Governor Dr. Hari Babu Kambhampati hi an sawipui tih an sawi bawk.