Union MoS for Health hnenah Health Minister in Mizoram mamawh hrang hrang a thlen

Health Minister Dr. R. Lalthangliana chuan Union Minister of State for Health & Family Dr. Bharati Pravin Pawar-i hnenah hriselna kawnga Mizoram dinhmun leh mamawh te a thlen.

Mizoram-a rawn zin Union Minister of State for Health & Family leh Dr. R. Lalthangliana te hian nimin khan Aizawl-a MINECO Conference Hall-ah inkawmna neiin Dr. Bharati Pravin Pawar chuan presentation hrang hrang a ngaihthlak hnuin National Health Mission hnuaia ECRP Package-I leh II-a Mizoram in sum a dawn zat te, 15th Finance Commission hnuaia hriselna atana Mizoram in sum a dawn te, PM-ABHIM hnuaia sum dawn te zawtin, heng hnuaia hmalak dan te pawh a zawt a. Mizoram Cancer Institute mamawh thenkhat te chu PM-ABHIM hnuaia proposal siama thehlut turin thurawn a pe a. Covid-19 hripui dona kawnga Mizoram hma lakna a hriat te chu tha a tih thu sawiin, Health Department officials te chu thingtlanga hriselna dinhmun ngaipawimawh zual tur leh henga inenkawlna hmun – CHC, PHC lehh Sub-Centre te chu tlawh fo thin turin a chah bawk.

Health Minister Dr. R. Lalthangliana chuan Covid hripui dona kawnga Scheme hrang hranga atanga damdawi leh hmanrua Mizoram in a dawn leh tunhnaia AYUSH lamah Mizoram in duhsakna a dawn ah te Union Minister hi lawmthu a hrilh a. PHC leh CHC-a Ambulance hman mek te chu a hlui tawh avangin Ambulance thar 30 Mizoram pe turin a ngen a. Hmarchhak biala State te chu State dang te nen tehkhinin an hnufum bik thu sawiin, hei vang hian Funding Pattern leh Guidelines te siamthat leh ennawn a tul a, chumi atan chuan Hmarchhak Health Minister ten Union Health Minister pawh tel ngeiin hengte hi sawiho a tul nia hriat thu te a sawi a ni.

Hei bakah hian District thar 3-a khum 75 theuh awm theihna tur District Hospital sakna tur ngaituah sak turte; ZMC-ah Lung, Kal, Tha leh Thluak lam Superspeciality dinna kawnga puihna leh Lung lam leh Kal lam inenkawlna Aizawl Civil Hospital-a neih mek tihlen belh leh tihchangtlun kawng dap pui tur te; PHC leh Sub-Centre engemaw zat sak thatna tur ngaihtuah sak turte; Scheme thar hnuaia ram puma rilru lam enkawlna Mental Hospital 40 din turah Mizoram chu telh ve tura ngenna te; ZMC chu Central Funding a enkawl dan ngaituah tur leh a hnuaia ruhrel mamawh zual din belhna tur sum ngaihtuah sak turte in a thlen a. JICA tanpuina hnuaia Mizoram State Cancer Institute tihchangtlunna kalpui mek te pawh a sawilang a ni.

Mizoram pumah District Hospital 12, Sub-District Hospital 2, CHC 9, PHC 61, Sub Centre 379 leh hmun kilkhawra mipui te hriselna enkawlna atan Health Clinic 170 a awm mek a. Heng ah te hian dam lo enkawlna tur khum 2197 awmin mimal leh private damdawi In-ah khum 1589 a awm bawk a. Department hnuaiah post chi hrang hrang hrang 19 awm mekin, heng hnuaiah hian sanctioned post 3896 a awm mek a; heng zinga 2880 chu hnawhkhah niin 1016 chu a ruak a ni.