Sawhthing chingtute harsatna ah MP (RS) in hma la

Mizoram Rajya Sabha MP K. Vanlalvena chuan niminpiah khan a chenna In-ah Rajesh Kumar, DIG Sector Hqrs BSF, Aizawl kawmin Mizoram-a Sawhthing chingtute harsatna a sawipui.

He inkawmna ah hian Mizoram Rajya Sabha MP chuan Mizoram-a Sawhthing chingtu thenkhat ten Tlabung bul, Khawthlangtuipui lui kaltlanga Bangladesh-a an Sawhthing tharchhuahte hralh an duh thu leh Tlabung chhehvela BSF te nena inhriatthiam tawnna an neih a tul thu a sawi a. Bangladesh leh Mizoram insumdawn tawnna tur, Border Haat chu hmun thum-ah neih turin India sawrkar-a Ministry of External Affairs hotute nen a thuphunga an sawi fel tawh thu leh Kawrpuichhuah-ah Indo-Bangla Trade Centre din tura India sawrkar leh Bangladesh sawrkar ten Agreement an neih tawh bawhzuia hnathawh mek a nih thu te sawiin, Mizoram atanga Bangladesh a hralh tur Sawhthing te chu lo tih din emaw, lo man emaw chu thil tul ni lova a hriat thu a sawi a. Mizoram-a Sawhthing tharchhuahte chu Assam sumdawng ten leiin Bangladesh ah tho Assam sumdawng te hian an hralh thin avangin hetianga kharchhawn tir lova kuthnathawktu ten Khawthlangtuipui kaltlanga Bangladesh-a hralh tlang mai hi an mamawh thu a sawi bawk.