ZMC-a Genomic Sequencing Laboratory la hmang theilo

Health Minister Dr. R. Lalthangliana chuan Zoram Medical College-a COVID-19 chi hrang hrang hmuhchhuah leh zirchian theihna tur Genomic Sequencing Laboratory chu Trial Run an neih tawhah an la hlawhtling loh avangin an la hman theih loh thu house a hrilh.

Nimin-a Assembly Session-ah MNF member pahnih Dr. ZR. Thiamsanga leh Zothantluanga leh Member dangte zawh belhna chhangin Health Minister chuan ZMC-a Genomic Sequencing Laboratory bun fel tawh ni mah se hman tan a la nih loh thu a sawi a, Trial Run tum 3 an neih tawh ah Test Kit dik tawk loh avangin a la hlawhtling lo deuh tih sawiin, tunah hian Test Kit thar chu lo thleng mai tura an beisei thu a sawi.

Dr. R. Lalthangliana chuan he Laboratory-a thawk tur mi 2 te chu Pune-ah training an neih tir tawh thu a sawi a, he Lab hi a taka kalpui tur chuan hman phalna an hmuh a ngai a, dilna an thlen mek thu sawiin, ICMR atangin phalna an hmuh thuai an beisei thu te, thla khat chhung an function tir thei tawh tura an beisei thu a sawi bawk.

Health Minister chuan Mizoram chhung District zawng zawngah Oxygen Plant an bunfel tawh thu sawiin, District tam zawkah minute khat-a Oxygen Ltre 250 siamchhuak thei an dah laiin, Lunglei-ah litre 1000 siamchhuak thei an dah thu a sawi a, sawrkar damdawi In-a Oxygen Plant an dah bakah hian PATH, USA in Synod Hospital leh Christian Hospital, Serkawn te chu litre 800 siamchhuak thei an pek thu a sawi a, hmun hrang hrangah Oxygen Plant bun theih a ni chu lawmawm a tih thu a sawi bawk.