Mizoram Governor in Mizoram Rural Bank hotute Raj Bhavan-ah a kawm

Zonuna Kawlni (LENKAWL) • March 2, 2022 • Comments • Mizoram

Mizoram Governor Hari Babu Kambhampati chuan Mizoram Rural Bank (MRB) hotute chu nimin khan Raj Bhavan-ah kawmin Mizoram chhunga an hmalakna leh mipui tana an rawngbawlna te bakah an hmachhawp te a sawipui.

He inkawmna ah hian MRB Chairman Vadde Jaya Chandra leh hotu dang te telin Governor chuan mitin banphaka Bank dah tur leh a mamawhtu leh a dawng tur ten sawrkar tanpuina sum leh pai-a an dawn theihna tura MRB hnathawh chu fakawm a tih thu a sawi a. MRB chuan Mizoram mipui nuai 12 zinga a tam zawk te tan Bank Account nuai 9 lai tha taka an enkawl avangin Mizorama Bank awm zinga a pawimawh ber pawl a nih thu te leh an mawhphurhna pawh a sang bik tih a sawi a. Mizoram hmun kilkhawr zawkah te Bank hawn an tum tih a hriat thu leh hmasawnna thlentu pawimawh tak an nih tur thu pawh sawiin, heng an hnathawhna te hi fak a phu rualin Mizoram chhunga Bank te tanlak an la ngai a; Bank zinga inzarpharh zau ber MRB chu hmahruaitu ni turin a chah a ni.

He hunah hian MRB Chairman Vadde Jaya Chandra chuan Mizoram Rural Bank chu Mizoram mipuite ta a ni tih sawiin, MRB a pawisa dahluh te pawh Mizoram tan chiah tangkaia hman tura pekchhuak a ni a, Private Bank te angin Mizoram pawnah Mizoram chhunga sum deposit te thawnchhuah a ni ve lo tih a sawi a. Mizoram hmun kilkhawr ber berah Mizoram mipui tan rawngbawl hna an thawk zel dawn a; Bank awmloh na hmun te pawh an zirchian tawh thu leh Bank hawn belh zel an tum thu a sawi a ni. Tunah hian MRB chuan sawrkar department zinga tlem te chiah customer a nei mek a; mi hausa leh sum ngah customer an neih tam loh thu leh an customer tam ber chu thingtlang mi leh sum thawhchhuah nei tlem zawk te an ni tih a sawi bawk.

MRB hi India ramah Regional Rural Bank (RRB) zingah Productivity per Branch-ah pakhatna a ni mek a. Kum 2020-21 chhung khan MRB hian hlep hlang cheng vbc. 38.55 a thawkchhuak a, North East India-a RRB zingah pahnihna a ni. MRB chuan kum 2023 ralhma in Customer Service Points (CSPs) neih hman te, District 11 chhunga khaw pakhat zel Model Village a siam leh Mizoram chhunga Branch 100 neih hman te pawh an tum a ni.