Vice President in Mizoram a rawn tlawh mek

India Vice President M. Venkaiah Naidu chuan zan hnih riak turin nimin khan Aizawl a rawn thleng a, Vawiin khan Assembly House-ah thu a sawi ang.

Vice President M. Venkaiah Naidu hian nimin khan Lengpui Airport atanga Mizoram hi rawn thlengin Airport-ah Governor Hari Babu Kambhampati bakah Health & Family Welfare Minister Dr. R. Lalthangliana leh Rajya Sabha MP K. Vanlalvena bakah Chief Secretary Renu Sharma, DGP Devesh Chandra Srivastava, DGAR Brig. Digvijay Singh leh Aizawl DC leh SP ten an lo dawngsawng a, hemi hnu hian Governor chenna Raj Bhavan pan nghalin Raj Bhavan-ah hian Deputy Chief Minister Tawnluia'n a lo dawngsawng thung a ni.

Vice President hi nimin vek khan Raj Bhavan-ah Chief Minister Zoramthanga chuan hmuin inkawmna an nei nghal a, he hunah hian Chief Minister chuan Mizoram chu kum 30 chuang State nihna chang tawh mahse All India Service-ah Cadre hran a la neih loh chu ngaihven ngai tak thil a nih thu leh inrelbawlna tha zawk nei turin Cadre hran neih State in a mamawh thu a sawipui a. Myanmar rambuai avanga mahni sahimna zawnga lo lutte Mizoram-in a lo bawihsawm dan te a sawipui bawk a ni. He inkawmna ah hian Governor pawh telin nimin chawhnu khan Vice Presidrnt pual hian Cultural Programme buatsaih a ni bawk.

Mizoram-a rawn zin mek Vice President hian Vawiin hian Mizoram Legislative Assembly Session neih mek ah thu a sawi dawn a, zanin hian Mizoram-ah riak lehin naktuk ah Mizoram chhuahsanin Sikkim a pan leh dawn a ni.