PMGSY-ah Contractor ten Tender an chhang hniam lutuk chu buaina a nih thu Chief Minister in a sawi

PWD changtu Chief Minister Zoramthanga chuan PMGSY hnuaia kawng siam turah Open Tender chhuah ah Contractor ten an chhang hniam lutuk thin chu an buaina a nih thu sawiin, PMGSY-ah kawngpui awmsa chhun tura kawng laih awihlo a ni chu PMGSY buaithlakna a nih thu a sawi bawk.

Nimin-a Assembly Session-a zawhna leh chhanna hunah Dr. BD. Chakma-in Chawngte leh Longpuighat inkar kawng PMGSY hnuaia laih chungchang a zawhna leh member dang te zawhbelhna dang a chhanna ah PWD changtu Chief Minister Zoramthanga chuan PMSGY hna ho chu a buaithlak thu a sawi a, “Open Tender in kan han ti a, an han in chhan hniam siak a, khata tanga eng percent below emaw-a an chhan khan pek lohin ‘Ka hniam si’ tiin Court-ah an kal a, a buai chhungin a buai khawlo zo ang tih kan hlau a, pek loh theihloh a ni a, sawrkar hmasa pawh an buai ve thoin ka ring,” a ti a. “Pek dawnin a pawisa kha a tlem tawh a, Contractor te hlep tur kha tih tlak a awm si lova, PMGSY kawng hi hei tak hi kan buaina a ni,” tiin 25% below te pawhin contract hi an chhang niin a sawi a. Restricted-a tih theih chu ni sela chuan hetiang hi a nih loh tur thu leh Open Tender-ah an inchhan hniam siak si avangin pe lo thei lo ah an awm thu leh hei hi an buaina a nih thu a sawi a. He kawng siam meka harsatna awm hrang hrangte chu an lo en tur thu leh hri leng pawhin ziaawm lam a pan tawh avangin theih-tawp-a hma an lo lak tur thu a sawi a ni.

PMGSY buaithlakna chu kawngpui va chhun tura laih an awihlo a ni tih Chief Minister chuan sawiin, khua leh khua inkara ngaih a nih a ngai tih a sawi bawk a, hei hi an buaina a ni fo tih a sawi bawk.

PWD changtu Chief Minister hian MNF Member F. Lalnunmawia zawhna pawh chhangin kum 2020-2021 chhung khan State Highway km 37-a thui leh National Highway km 25-a thui chei that (resurfacing) a ni tih sawiin, kum 2021-2022 ah State Highway km 25 chei that a nih thu a sawi bawk a ni.