Mizoram-ah Rubber chin belh zel tum a ni

Zonuna Kawlni (LENKAWL) • March 10, 2022 • Comments • Mizoram

Land Resources, Soil & Water Conservation Minister R. Lalzirliana chuan Mizoram sawrkar in Rubber chin belh zel a tum thu a sawi.

Nimin a Assembly inkhawm zawhna leh chhanna hunah MNF Member H. Biakzaua zawhna a chhanna ah Minister R. Lalzirliana chuan he thu hi sawiin tun dinhmunah Mizoram-ah Rubber kung puiting leh hnai theih 2,00,000 vel a awm tawh thu a sawi a, ram hectare khat-ah Rubber kung 500 chin theih a nih thu leh a hnai hi kg. ah Rs. 145/- vela hralh thin a nih thu sawiin, Rubber Plantation siam thar tumna a awm thu a sawi bawk a. Rubber puitling tawh leh hnai mai turte tan sawrkar in Rubber Smoke House 50 sak a tum thu a sawi bawk.

Hei bakah hian Land Resources, Soil & Water Conservation Minister R. Lalzirliana chuan SEDP hnuaiah an Department in hmalakna a nei tawh MNF Member Dr. K. Pachhunga zawhna chhangin a sawi bawk a. An hmalakna tarlangin Kuhva chingtu chhungkaw 300 hnenah tanpuina pek a nih tawh thu leh Kuhva tiak (Thailand variety) chhungkaw 60 hnenah pek tawh a nih thu a sawi bawk a, kum 2022-2023 chhung atan SEDP hnuaiah ruahmanna siam a nih thu a sawi bawk.