Vairengte leh Sairang inkar kawngpui 4 Lane laih tur zangnadawmna ah Department a inrawlh lo

Land Revenue and Settlement Minister Lalruatkima'n Vairengte leh Sairang inkar kawngpui 4 Lane-a laih tura zangnadawmna pek chungchang ah Department-in inrawlhna a nei lo tih sawiin, kawng laitu NHIDCL buaipui vek a ni tih a sawi.

Nimin-a Assembly Budget Session-a ZPM member Vanlalhlana'n Vairengte leh Sairang inkar kawngpui laih tur chungchang leh he kawng laih tura zangnadawmna la tur tihfel vek tawh siamthat leh a nih chhan a zawhna a chhannaah Revenue Minister Lalruatkima hian, zangnadawmna hi Mizoram Sawrkar pek emaw ti an awm fo chu an hriat sual a ni tih a sawi a. National Highway laih turah reng reng NHIDCL-in ram lak chungchang buaipui turin National Highway Act 1956 hmangin Competent Authority for Land Acquisition (CALA) an ruat thin a, chu chuan thil tul zawng zawng an buaipui a, ram tehtu tur Surveyor an neih loh avangin Mizoram Sawrkar chuan Surveyor an pe a, chumi tih loh thil dangah inrawlhna an nei lo tih sawiin, ram lak tur buaipui tu tak chu Sawrkar ni lovin NHIDCL in an aiawh tura a ruat CALA te an ni tih a sawi a. Ram lak tur enfiah chungchang hi CALA thuneihna a nih angin NHIDCL lamin zangnadawmna pek tur hi engzat nge tih Mizoram Sawrkar a la hriattir loh avangin sawi theih a la ni lo tih a sawi bawk.

Revenue Minister chuan, NHIDCL-in a aiawha a ruat CALA-in zangnadawmna pek dan tur Rate a ruahman chu sang an tih deuh avangin Department-ah an thlen thu pawh sawiin, rate a bituk chu ennawn a nih hnuah a dik chiah lova hriat a nih avangin siamtha a, ennawn leh tura tih a ni, a ti a. Hetihrual hian Land Revenue and Settlement chu a rate fix tu an ni lo a, a rate chungchang hi kum 3 kalta chhunga Stamp Registration an neih percentage atang lak a ni tih a sawi bawk.

Zangnadawmna la turte hming tarchhuah tawh ennawn leh a nih chungchangah Zangnadawmna la turte hming list chu Government of India Gazettee leh NHIDCL portal-ah dah vek tawh pawh nise, ruahmanna chhinna mai chauh a la ni a, kha list kha final a la ni lo tih Lalruatkima chuan a sawi a. Zangnadawmna la turin Competent Authority-in dan ang taka a pek pass neih a ngai a, Land Act-ah VC pass chu a thenah pawm a ni a. Vairengte leh Sairang inkar khua chu Survey Village a puan a ni a, heng khua Notified Town-te Survey Village a puan a nih hmaa Village Council-in an khaw huam chhunga Pass a lo pek te chu Land Revenue and Settlement Competent Authority-in a pek ni lo pawh pawm loh theih loh a ni a, huan lo ram erawh pawm a ni lo tih a sawi bawk.