Union Minister in Governor leh Chief Minister a kawm

Zan khat riaka Mizoram-a rawn zin Union Minister of Ports, Shipping and Waterways and AYUSH Sarbananda Sonowal chuan Mizoram Governor leh Chief Minister te a kawm.

Sarbananda Sonowal hian nimin khan Raj Bhavan-ah Mizoram Governor Hari Babu Kambhampati chu kawmin Governor chuan Mizoram in a mamawh em em ramchhung luidungte inkalpawh theihna atana siam leh Mizoram a ramhmul tam tak te tangkaina te hlawk zawka hman a ni theihna tur Central Sawrkarin a rawn ngaihven chu lawmawm a tih thu a sawi a. Central Sawrkarin project pawimawh tak pahnih - Bairabi to Sairang Railways Project leh Kaladan Multi-Modal Transit Transport Project (KMMTTP) bakah PM-DevINE hnuaia project a pek avanga Mizoram mipui an lawm thu sawiin, “Railway kawng leh KMMTTP a puitlin hunah chuan Mizoram hmel a danglam dawn a, State hmasawn nasa ber pawh a ni dawn a, hei hi kan nghakhlel tawh hle a ni,” a ti bawk.

Hemi hma nizan hmasa khan Union Minister hian Chief Minister Zoramthanga chu Chief Minister Bangla-ah hmuin Mizoram hmasawnna tura hmalakna hrang hrang te an sawidun a, Chief Minister Zoramthanga chuan Union Minister Sonowal chu Transport Department hotute nen lui hmanga inkalpawhna (inland waterways) chungchanga meeting nei zo chiah a nih angin hemi kawnga State in hmachhawp a neih te chu a hlawhtlin a nih ngei theih nan hma lakpui turin a ngen bakah Mizoram tan All India Service-ah Cadre hran neih pawimawhna te a sawipui bawk.