Ni khat-a hri kai hmuhchhuah tlahniam ve zel

COVID-19 hri leng chuan Mizoram-ah ziaawm lam a pan ve hret hret niin a lang a, niminpiah khan Mizoram-ah Sample 3753 enfiah ni lehin hri kai mi 680 hmuhchhuah an ni a, Sample enfiah atanga za zela 18.12 te chuan hri an kai a ni.

Niminpiah khan ZMC-a RT-PCR Laboratory-ah Sample 147 enfiah niin heng atang hian hri kai mi 31 hmuh leh an ni a, Lunglei-a RT-PCR Laboratory-ah Sample 4 enfiah niin hri kai mi 3 hmuh an ni bawk. Fluorescent Immunoassay Test hmangin Aizawl District-ah Sample 57 enfiah niin hri kai mi 4 hmuh an ni a, Serchhip District-ah Sample 7 enfiah niin hri kai mi 3 hmuh an ni a, Thenzawl khua vek an ni.

District hrang hranga TrueNat Laboratory-ah Sample 170 enfiah ni bawkin heng atang hian hri kai mi 53 hmuh an ni a, an zinga 45 te chu Mamit District-a hri kai hmuhchhuah te niin Serchhip District-ah hri kai mi 8 hmuh an ni bawk.

Rapid Antigen Test hmangin niminpiah khan Mizoram-ah Sample 3368 enfiah ni bawkin heng atang hian hri kai mi 586 hmuh an ni bawk a, Serchhip District-ah hri kai hmuhchhuah tam berin mi 110 hmuh an ni a, Aizawl District-ah 102 hmuh niin Mamit District-ah 89, Saitual District-ah 67, Lunglei District-ah 62, Champhai District-ah 51, Hnahthial District-ah 49, Khawzawl District-ah 22, Kolasib District-ah 16 leh Siaha leh Lawngtlai District-ah hri kai mi 9 ve ve hmuh an ni bawk.

Nimin khan Mizoram-ah hri kai enkawl dam mi 1099 awm belh lehin heti hian Mizoram-a hri kai hmuhchhuah chu 2,16,036 niin an zinga 2,10,462 te chu enkawl dam an ni tawh a, hri kai zinga za zela 97.42 te enkawl dam ni tawhin enkawllai 4914 an la awm a, hri kai zingah mi 660 an boral tawh bawk a ni.