TIPM te duhna Mizoram sawrkar in tha a ti

Zonuna Kawlni (LENKAWL) • March 9, 2022 • Comments • Mizoram

Assam-a Karimganj District chhung, Singla leh Langkaih ruam a Mizo awm ten Mizorama beh an duhna chu Mizoram sawrkar chuan tha a ti.

Independent MLA Vanlalhlana zawhna ziaka chhangin Home Minister Lalchamliana chuan helai a cheng zohnahthlak, Thangram Indigenous People’s Movement (TIPM) hming invuahte an awmna ram chawpa Mizoram-a beh an duh thu tarlanna Mmorandum chu India Prime Minister hnenah an thehlut tawh niin a sawi a. Hemi chungchangah hian tun thlengin sawrkar laipui emaw, Assam sawrkar emaw hnen atangin Mizoram sawrkar ngaihdan zawhna dawn a la ni lo, a ti.

Home Minister Lalchamliana chuan TIPM hmalakna hi Mizoram sawrkar chuan tha a tih thu sawiin, Ministry of Home Affairs-in hmarchhak State hrang hranga ramri buai zirchiang tura a ruat – Manohar Parrikar Institute for Defence Studies and Analysis Team an lokal huna pek tur, ramri chungchanga Mizoram tanchhan tarlanna ‘Approach Paper’ ah TIPM dilna pawh hi tarlan a nih thu a sawi bawk.

TIPM Financial Secretary J. Mawia chuan Thangram bial hi mel 180 bial a ni a, khaw 24 awmin mihring hi 30,000 vel an awm thu a sawi a. Assam-a Karimganj District-a awm lova Mizoram-a rinluh an duh thu hi sawrkar laipui thuneitute hnenah an thlen tawh thu a sawi a ni.