Hmeichhia te ni ah Police ten Dan an zirho

Zonuna Kawlni (LENKAWL) • March 9, 2022 • Comments • Serchhip

Serchhip Police te chuan nimin, March 8, 2022-a ‘International Women's Day’ pual khan ‘End Violence Against Women’ tih thupui hmangin Dan leh hrai inzirtirna hun an hmang.

Serchhip SP Conference Hall-a he ni puala hun hman ah hian Serchhip khawpui chhunga Police Hmeichhia te leh Police nupui inzawmkhawm pawl, Mizoram Police Wives Welfare Association (MPWWA) Serchhip Unit-a Executive Member te an tel a, he hun hi Serchhip Addl. SP Vanlalnghenga chuan kaihruaiin he huna tel te chu ‘International Women's Day’ puala chibai bukin duhsakna a hlan a, hmeichhia te pawimawhna hrang hrang, a bikin chhungkua a an pawimawhna te sawiin, Police nupui te phei chu an pasal te Duty pawimawh tak neia chhuak thin an nih avangin inchhungkhur-ah an pawimawh lehzual zia te hriaa chhungkaw enkawlna kawngah te pawh theihtawp chhuah turin a chah bawk a ni.

He hunah hian Addl. SP hian ‘Handling of Social Media’ tih thupui hmanga kalkhawm te hi zirtirna pe in tunlai khawvel changkang zelah Social Media hman kawngah, a bik takin hmeichhia leh naupangte tana fimkhur a pawimawh zia te a sawi a. Serchhip SDPO Office-a Reader SI Melody Lalmuanpuii chuan ‘Crime Against Women’ tih thupui hmanga zirtirna pein hmeichhia te chunga hleilenna thleng thin chungchanga Dan pawimawh te leh hursualna laka naupangte venhimna Dan, Protection of Children from Sexual Offences Act, 2012, (POCSO Act) chungchang a sawifiah a. Serchhip Police Station-a OC, SI C. Lalremthanga chuan nitin kan khawsakna kawnga Dan pawimawh hrang hrangte chu kalkhawmte hi a zirtir bawk a ni.