Raltlan chhawmdawl nan nuai 380 seng tawh

Myanmar ram buai avanga Mizoram-a raltlante chhawmdawl leh enkawlna atan sawrkar chuan cheng nuai 380 a seng tawh.

Home Minister Lalchamliana’n eptu pawl hruaitu Lalduhoma leh Congress Member C. Ngunlianchunga leh Lalrindika Ralte te zawhna ziaka chhangin Mizoram sawrkarin raltlante a tanpui rual hian sawrkar laipui chuan Mizoram sawrkar hnenah kawng hrang hrangin sum a pe a ni, a ti a. Sawrkar in kumin February ni 12 thlenga a chhinchhiah chinah Myanmar atanga Mizoram-a raltlan lo lutte hi mi 24,289 an tling tawh a, an zinga 9,033 te chu an puala ruahman Relief Camp-ah an awm a, a dang mi 15,256 te erawh chuan an chhungte leh thiante belin a then chuan In an luah hawh bawk a ni. Raltlante hi District zawng zawngah an insemdarh a, Siaha District-ah tam berin 8,381 an awm a, Champhai District-ah 5,925 awmin Lawngtlai District-ah 5,409 an awm bawk a ni.

Home Minister chuan cheng nuai 380 hi District Bawrhsap Pisa kaltlanga raltlante hnena pek a nih thu sawiin, Relief Camp sakna, Relief Camp-a Electric pawh luhna, Tui dahkhawlna tuizem leina, Ek In sakna senso, eitur leh damdawi bakah thawmhnaw lum leh mutbu leina atan te hman a ni, a ti. Raltlan chhinchhiah hun hi a rei tawh avangin tunah hian mi 30,000 chuang vel zet raltlan hi awm tawha rin a ni bawk.