Supplementary Demand for Grants pawm a ni

February ni 24-a Finance changtu Chief Minister, Zoramthanga'n Sawrkar kumthar 2022-23 atana Mizoram sum hman tur ruahman a pharh tak chu nimin atang khan sawiho a ni a, Sawrkar kum kal mek 2021-22 chhunga Sawrkar sum indaihlohna phuhrukna tur, Supplementary Demand for Grants chu a pawm a ni.

Nimin-a Assembly Budget Session zawhna leh chhanna zawh hnuah Supplementary Demand for Grants hi House pawmpui turin Finance changtu, Chief Minister, Zoramthanga'n a pharh a. Sawrkar kum kal mek chhunga Sawrkar sum indaihlohna hi avaiin cheng vbc. 6,025.44 a ni a, heng zinga cheng vbc. 3,863.97 chu House-in a pawmpui ngai kher lo, Charged Expenditure a ni a. A bak zawng cheng vbh. 2,161.47 chu House-in a pawmpui ngai chi Voted Expenditure a ni thung a. Hei hi House chuan a pawm a ni.

Dan pangngaiah chuan Supplementary Demand for Grants hi member ten an sawi chhunzawm ngai lem lo a, nimin a Chief Minister-in a pharhna ah hian Opposition Group Leader, Lalduhoma chuan Supplementary Demand hnuaiah hian sawrkar sum hmanna tam tak a awm avangin dik lo taka thil tih theihna hmanrua a nih palh theih avangin sawiho a rawt a, hei hi tun hma lam atanga tihphung a nih loh avangin Speaker, Lalrinliana Sailo chuan rem a ti lova, hemi avang hian rorel lai leh eptu member te chu House chhungah an inhnial buai nual a ni.

Hemi hnu hian Sawrkar kum thar 2022-23 atana Mizoram Budget a tlangpuia sawihona neih zui niin member 6 ten an sawi a, sawi zui tur an awm loh avangin ruahman lawk aia hma ah thutkhawm tihtawp a ni.
(El-a)