House-ah Kuhva rah tawlh sawichhuah a ni

Kuhva rah tawlh man turin thupek dinglai a awm - Home Minister

Home Minister Lalchamliana chuan District tin DC leh SP te chu kuhva tawlhruk a awm leh awm loh endik a, a awm a nih chuan man turin thupek dinglai a awm tih Assembly House a hrilh a. District Magistrate ten thil an mante anmahni thu-in a hmuna tihchhiat theihna an nei lo tih a sawi bawk.

Nimin-a Assembly Budget Session chhunzawm-ah Congress Member C. Ngunlianchunga'n Kelkang dai-a kuhva tawlhruk man a nih chungchang a zawhna leh zawh belhna dangte a chhannaah Home Minister hian, nikum February ni 25-a Congress Group Leader, Zodintluanga'n Kuhva tawlhruk chungchang House-a a sawichhuah tum khan Central atangin dang turin lo ti mahse, Mizoten an hlawkpui ve avangin an mit an lo siai tih a lo sawi tawh a, tunhnuah kuhva tawlhruk chu a serious zia leh that loh zia an hriat chhoh zel avangin khap turin hma an la tih a sawi a, District tin DC te hnenah tum hnih (2) khap tura hriattirna pek an ni tawh a, tunah hian Serchhip khawdai Sialiamkawn leh Sihhmui-ah a enfiahna hmun, Check Gate siam mek a ni tih a sawi bawk.

Home Minister chuan, Kelkang daia kuhva tawlhruk man tu chu Maria CT. Zuali, Champhai Deputy Commissioner a ni tih sawiin, a hriatthiam dan leh dan hre mite hrilh dan chuan DC te hian Police leh Excise te ang bawkin Sawrkar khap thil chu an man thei a, amaherawh chu anmahni thu in a hmuna tihchhiat theihna an nei lo tih a sawi a. Kalphung pangngai angin thil dik lo chu an man ang a, thubuai an siam sak chu Court-in a ngaihtuah hnuah tih dan tur a hrilh angin an bawhzui mai tur a ni tih a sawi bawk.

Kuhva tawlhruk man tu laka FIR thehluh a nih chungchangah a mantu Champhai DC chu Prosecution thlenga chhan tum a nih leh nih loh zawhna chhangin Home Minister chuan, a hriat chinah chuan chhan tumna emaw, tum lohna emaw a awm lo a, he thil hi Home Department lam khawih a ni chiah lo a, report lo lut chu Law Department-ah enfiah turin a kal mek ni-a a hriat thu a sawi a. Dan lova sumdawnna kalpui chu tu sawrkar mahin a phal lo a, kuhva tawlhrutute chu a theih chin chinah chawitir emaw, thil dang emaw-a hrem an ni tih a sawi a, kuhva tawlhtute chu Court-ah tuman an la khing lo ni-a a hriat thu pawh sawiin, kuhva phurtuten an khing letling zawk thin tih a sawi a. Thil tidik lotute hrem tur chuan FIR thehluh ve hmasak phawt a ngai thin a, Vanramchhuangi'n FIR thehluh chungchang ah thubuai ziahluh tur a nih leh nih loh  Police lamin Court rorelna lam an rawn mek ni-a a hriat thu a sawi bawk.

(El-a)