Serchhip District Beti Bachao Beti Padhao buatsaihin nikhat awh Art Workshop neih a ni

Serchhip District Beti Bachao Beti Padhao (BBBP) buatsaihin nimin khan Serchhip DC Conference Hall-ah ni khat awh ‘Art Workshop’ neih a ni a, he Workshop hi District Bawrhsap Nazuk Kumar IAS chuan a hawng a ni.

Workshop hawnna hunah hian Bawrhsap chuan India ram zau zawk en chuan hmun tam takah hmeichhiate dinhmun a la hniamin venhimna leh zirtirna tha pek thu ah nasa taka hmasawnna tur a la awm hlawm tih a sawi a. Mizoram erawh chu hmun dang te ngaihtuah chuan kan dinhmun a tha hle tih sawiin, Serchhip District phei chu kan dinhmun a tha hle a ni, a ti a. Amaherawh chu hmasawn kan ngaihna laite pawh tam tak a la awm tho tih sawiin, “Property Right lamah te, Legal Right chi hrang hrangah hmasawn tulna a la awm a ni,” a ti a. Hmeichhia ten hma an sawn zel theihna chu he programme in a tum ber a nih angin hmalakna pawh kawng hrang hrangin kalpui zel a nih thu sawiin, tun tuma Art Workshop an buatsaih a hlawhtlin theih nana an thawhpuitu Aizawl Art Gallery & School of Fine Art te chungah lawmthu a sawi a. Amah ngei pawh Art lamah a tui hle tih sawiin, nimin-a Workshop ah pawh hian lem ziakin a tel ve nghe nghe a ni.

Serchhip Addl. DC Lalmuansanga Ralte kaihhruai he hunah hian Aizawl Art Gallery & School of Fine Arts-a Chairman Laltanpuia pawhin Serchhip District BBBP thuneituten Art Workshop buatsaih nachang an hria leh thawhpuia an sawm chu lawmawm a tih thu a sawi a. “Lemziak te hian sawi aia fiahin thinlungah hna an thawk thei a, mitthla-a cham reng thuchah min pek thin avangin a hlu em em a. Hmeichhiate venhimna leh zirtirna kawnga mite thinlung cham reng lemziak tha tak tak neih ngei kan tum dawn a ni,” a ti bawk.

Workshop hawnna neih zawh a nih hnu hian Workshop hi neih chhunzawm nghal a ni a, Aizawl Art Gallery & School of Fine Arts atanga lokal Senior Artists pathum leh Junior Artists 12 bakah District Bawrhsap Nazuk Kumar IAS ten thupui pathum- Women Empowerment, Promotion of Education to Girl Child leh Gender Equality tih zinga an duh ber hmangin lem an ziak a. Serchhip khawpui chhunga zirlai naupang leh a duh apiangte tlawh theihin ruahmanna an siam bawk a ni. An lemziakte hi International Women's Day, 2022 lawmnaah Exhibition neihpui leh tura ruahmanna siam a ni.