Chanchin thar lawrkhawm
Rawtna sawiselna ngaithla
P&E Department-in Financial Year 2022-2023-a Electric Bill tihsan an rawtna kal mekah mipui atanga sawiselna awm te ngaihthlakna hun, Public Hearing chu nimin khan Joint Electricity Regulatory Commission for Manipur & Mizoram chuan Aijal Club Conference Hall-ah ah buatsaih a, he hunah hian mi 10 atangin sawi-selna dawn te ngaihthlak a nih hnuah a hmun ah ngei E-in-C, P&E Department chuan an sawiselna hrang hrangte chu a chhang nghal bawk. P&E Department in Electric Bill tihsan a tum dan hi Commission-in ngun takin mipuite ngaihdan la chungin a la tichhuak dawn a, Electric hman man thar tur hi sawrkar kum thar, April 1, 2022 atanga hman tan tur a ni ang.
Mamit tuilakna tlawh
Mamit District MJA leh District Information & Public Relations Officer, Mamit te chuan NABARD, Rural Infrastructure Fund, RIDF Project hnuaia Mamit khawpui chawmna tura Tui lak hna kalpui mek chu an tlawh a, Augmentation of Greater Mamit, W/S/S Part-I (Raw Water) hi cheng nuai 670 senga kalpui mek niin Dec. 13, 2019 khan bultan niin tun thla ni 31-a peihfel hman tura ruahman a ni. Nimin heng mi te lo dawngsawngtu Mamit PHE SDO V. Lal-danmawia chuan tuna Project Part-I an thawh mek hian Mamit ala thlen theih dawn loh thu leh Part-II nghah a la ngaih dawn thu a sawi a, Tui lakna hnar (catchment area) chhehvela ramngaw te chu tuihna a chhiat loh nana vat chereu a, hal lo turin mipuite a ngen nghal bawk.
Zirchhuak ten thutiam la
Auxiliary Nurse Midwife (ANM) School, Lawngtlai chuan nimin khan LADC Conference Hall-ah 5th Batch zirlaite lukhum khumtirna leh khawnvar chhi-a thutiam lakna hun, Capping and Lamp Lighting Ceremony an buatsaih a. ANM School Lawngtlai hi October, 2017 khan zirlai 20 awma bul tan niin, Batch thumin an zirchhuak tawh a, mi 40 in an la zir mek a ni.
Minister 2 te demand pawm
Nimin-a Mizoram Legislative Assembly in-khawm ah Minister te Department enkawlna tura sum ruahman chu sawiho leh niin Minister pahnih te demand chu pawm a ni a, heng te hi Deputy Chief Minister Tawnluia Department enkawl 3 te tana sum ruahman Rs. 11,80,61,46,000/- leh Minister Lalruatkima enkawl Department 3 te tana sum ruahman Rs. 4,79,74,66,000/- te a ni. Session neih mek hi Pisa chawlh a nih avangin Vawiin atanga Pathianni thleng khian chawlh a ni dawn a, karleh Thawhtanni-ah thutkhawm hi neih chhunzawm leh a ni ang.
Minister in BJP Office tlawh
Mizoram-a rawn zin Ministry of Ports, Shipping and Waterways leh Ministry of AYUSH changtu Minister Sarbananda Sonowal chuan nimin khan Aizawl-a BJP Office tlawhin an Party hruaitute nen inkawmna an nei a, Mizo Hnam nunze mawi tak leh leilung mawi tak te chhuanawm a tih thu sawiin, Mizoram leh NE States te bakah India rama chengte chuan hma-sawnna kan neihna turin kan tanruala, inlung-rualna leh inngaihsaktawnna te kan vawnnun a tul thu a sawi a, chutianga kan kal chuan nasa takin hma kan sawn leh zual thei dawn a ni, a ti bawk.