Serchhip-ah Hmeichhia te ni hmangin Hmeichhe chawimawi phu te chawimawi an ni

Nimin khan Serchhip-ah District Task Force Committee on BBBP Serchhip te bultumin ‘International Women's Day’ hman a ni a, he hun hi District Bawrhsp leh District Task Force Committee Chairman Nazuk Kumar IAS chuan khuallian nia hmanpuiin hmeichhia chawimawi tlaka hna thawk thlanchhuah te hnenah chawimawina hlan an ni bawk.

Serchhip DC Conference Hall-a he hun hman ah hian Bawrhsap chuan ‘International Women's Day 2022’ chu Hmeichhiate tana ni pawimawh leh chhinchhiah tlak anih thu sawiin,infiamna leh zirna kawngah khawvel huapa Hmeichhe hlawhtling tak tak an awm thu leh chung mite chu chhuanawm a tih thu a sawi a. Hmeichhia te dikna leh chanvo humhalhna kawngah theihtawp chhuah a hmalak chhoh mek anih thu te, hmeichhia ten zirna kawngah nasa taka hma an sawn chho ta te chu lawmawm a tiih thu sawiin, BBBP te hmalakna pawimawh tak zinga pakhat anih thu a sawi a. Hmeichhiate chu mawhphurhna pawimawh tak pahnih, nitin eizawnna hna bakah Inchhung lam sekrek hna an thawhna kawngah mahni inringtawk taka hmalam pan zel tura fuihin, sawrkar inrelbawlna kawngah Serchhip District-ah ngei pawh hmeichhe Officer lian tak tak leh chhuanawm tak tak an awm chu lawmawm a tih thu a sawi bawk.

Serchhip DC Office-a SDO (Sadar) C. Laltleipuii kaihhruai he hunah hian Serchhip District chhunga kawng hrang hranga Hmeichhe chhuanawm thlanchhuahte hnenah Serchhip District Task Force Committee on BBBP chuan chawimawina an hlan a. Heng chawimawina hlan tak te hi Hmeichhia Front Line Worker leh Anganwadi Worker hna thawh tha te bakah District chhung zirna In hrang hranga hmeichhia zirlai pass thate thlanchhuah School te niin chawimawina thuziak hlan an ni.

Nimin-a ‘International Women's Day 2022’ puala hun hman zawh a nih hnu hian Beti Bachao Beti Padhao (BBBP) Serchhip ten ‘Art Workshop’ an buatsaih a Lemziak te chu a duh apiangte en theih turin DC Meeting Hall-ah tarchhuah a ni bawk.