Pathianni-ah hri kai 228 hmuh belh leh an ni

Pathianni khan Mizoram-ah Sample 1288 enfiah niin heng atang hian COVID-19 hri kai mi 228 hmuhchhuah an ni a, Sample enfiah te atangin za zela 17.70 te chuan hri an kai a, hri kai enkawllai pawh mi sang li aiin an tlem ve leh tawh a ni.

Pathianni khan ZMC leh Lunglei-a RT-PCR Laboratory-ah Sample enfiah awm lovin District hrang hranga TrueNat Laboratory-ah Sample enfiah a awm lo bawk a, Fluorescent Immunoassay Test hmangin Aizawl-ah Sample 37 enfiah niin hri kai mi pakhat hmuh a ni. Hei bakah hian Rapid Antigen Test hmangin Sample 1251 enfiah niin hri kai mi 227 hmuh an ni a, Aizawl District-ah 102, Mamit District-ah 45, Saitual District-ah 27, Lunglei District-ah 22, Hnahthial District-ah 13, Champhai District-ah 11, Kolasib District-ah 6 leh Lawngtlai District-ah mi pakhat te an ni.

Nimin khan Mizoram-ah hri kai enkawl dam mi 1153 awm belh ve lehin heti hian Mizoram-a hri kai hmuhchhuah tawh chu 2,17,834 an ni a, an zinga 2,13,800 te chu enkawl dam ni tawhin hri kai hmuhchhuah atanga za zela 98.15 te chu enkawl dam an ni tawh a, hri kai enkawllai 3370 la awmin hri kai zingah mi 664 an boral tawh a ni.