Fertilizer tawlh chungchang Minister in enzui tum

Agriculture Minister C. Lalrinsanga chuan dan lova fertilizer tawlh chungchang chu Department-in Official takin hre lo mah se lo enzui a, dan anga action lak ngaihna ah pawh action an lak zel tur thu House a hrilh.

Nimin-a Assembly Session neihah MNF Mmber Lawmawma Tochhawng zawhna kal zelah ZPM Legislature Party Leader Lalduhoma'n Congress sawrkar hun lai atang tawha Fertilizer Smuggling kalpui chu tihtawp tum a nih leh nih loh Agriculture Minister hi a zawt a. Agriculture Minister C. Lalrinsanga chuan, Fertilizer License neitu Dealer te'n Fertilizer/Urea an hralhchhuah dan chu District Fertilizer Inspector ten uluk taka an endik thu leh Inspection Report-a a lan dan chuan Fertilizer chu loneitute hnenah pekchhuah thin a ni a, Myanmar lama dan lova tawlhruk chungchang erawh Official Report dawn a awm loh thu a sawi a. Dan lova Fertilizer tawlhruk chungchang chu lo en zui an tum thu sawiin, a tul angin action lak ngaihna ah pawh action kan lo la zui ang, a ti.

Agriculture Minister chuan, Lunglei khawpui ei bel ber Zawlpui zau, Tuipawl zau, Putlungasih leh Tuisen chhuah, Boliaveng ram rai tha chu Department-in a ngaihpawimawh thu a sawi a, heng ram te hi tih hmasawn tumin Central Scheme hrang hrang Department-in a kalpui te leh SEDP hnuaiah te hmalak mek a nih thu bakah, hmalak zelna tur pawh ruahmanna siam a nih thu a sawi bawk.