MYC-a diklo taka sum hman CAG Report-ah tarlang

Tunhnaia Comptroller and Auditor General of India (CAG) Audit Report Assembly House dawhkan-a pharh chuan Mizoram Youth Commission (MYC)-in Rs. 133,92,000/- zet chu dik lo takin a hmang tih tarlan a ni.

CAG report-in a sawi dan chuan MYC hian kum 2016 khan Ministry of DoNER hnenah Mizoram sawrkar hnuaia thawk Group C leh D-te Information Technology lama hma an sawn theihna turin Course on Computer Concept Plus (CCC Plus) buatsaih a, Group C leh D hnathawk 1,500-te IT lama an thiamna tihsan nan rawtna a siam a. Chu rawtna chu pawmin Ministr of DoNER chuan March 2017 khan cheng nuai 133 chu a rawn sanction ta a. Audit-in an endikna ah chuan April 2017 leh May 2018 inkar chhung khan Group C leh D hnathawk mi 1,499 chu Department 48 atanga thlangin IT Training an pe niin an sawi a. Mahse, hei hi phuahchawp a cheng nuai 133 hman ralna niin a tarlang a ni.

CAG Audit Team-in Department 48 hnena thu an zawhfiahna ah Department 45 chhanna an hmu tawh a. Department 45-te chuan he training a tel ni a sawi mi 1,300 te chu an Department hnathawk an nih loh thu an sawi a. Forest Department-a mi 2, LESDE-a mi 4 leh PHE-a mi pakhat te chu an Department-a thawk an ni a, Forest Department chuan an hnuaia thawk 2-te pawh hi Training tura thlan an ni lo niin an sawi a. Supply Department, Health Department leh PWD-a thawk training anga ziahlan mi 199 te chungchanga chhanna ni nghah mek a ni.

CAG report chuan Sawrkar hnathawk 1,295 training-na atana sum hman hi inbumna ni a an ngaih thu sawiin, Sawrkar hian chhui zuiin sawrkar hnathawk a tak awm lo training-na senso diklo taka a mawhphurtu Officer-te chu hremna pe ngei turin rawtna a siam a ni.