Ramri buai chinfel dan tha ber ‘inbiakna a ni’ tih Boundary Committee ngaihdan a ni - Home Minister
Home Minister, Lalchamliana'n ramri buaina chinfel dan tha ber chu ‘Inbiak a ni’ tih Boundary Committee ngaihdan a ni tih sawiin, Inbiakna neih huna Mizoram dinna hmasa chu 1875 Notification a nih tur thu House a hrilh a. Aitlang Buarchep leh Saihapui ‘V’ atangin Assam Police te hnawhchhuah tum an nih thu a sawi bawk.
Nimin-a Assembly Budget Session-a Congress Member, Lalrindika Ralte zawhna leh zawhbelhna dangte a chhannaah Home Minister Lalchamliana chuan Mizoram leh Assam ramri dik tak chu Inner Line Regulation 1873 behchhan a siam, 1875 Notification a ni tih chu Mizoram Sawrkar mai ni lo, Mizo mipui, Party zawng zawng leh NGO hrang hrang pawm dan a ni, a ti a. Hei hi a hlawhtling dawn nge dawn lo tih chu sawi lawk theih a ni lo tih a sawi a. Nikuma Vairengte daia State pahnih sipaite an inkah hnu khan a hmunah DC Level-a inbiak nghal a ni a, Chief Secretary te New Delhi-ah an inbe leh a, tunhnaiah CM ve ve te pawh inhmu a, amaherawh chu ramri-a harsatna chinfelna turin thutlukna mumal vawiin thlengin a la awm thei rih lo tih a sawi.
Home Minister Lalchamliana chuan, District Council leh UT hun laite, State nih hnu thlenga ram hruaitu zawng zawngin ramri chu chinfel an duh theuh tih a sawi a, hetihrual hian ramri chu Mizoram Sawrkar duh ang ngawta chinfel theih a ni lo a, State pahnih inkar thil a nih avangin remtih tlan anga chinfel a ngai a ni, a ti a. Mizoram leh Assam ramri chinfel dan tur rawtna siam turin Chief Minister hmalakna in nikum July ni 14 khan Political Party zawng zawng leh NGO aiawhte an inrawnkhawm a, hetah hian heng pawl te telna Boundary Committee din an rel angin, Dy. Chief Minister kaihhruaina hnuaiah Boundary Committee hi din a ni a, tum 3 an thukhawm tawh a, Committee chuan ramri buaina chingfel tura hmalaknaah engtianga bawhzui tur nge tih an ngaihtuah a, JAC on Inner Line Forest Reserved Demand-in Central Sawrkar-a Boundary Commission rawtna a lo thlen tawh chu thil awmze nei lo ni-a ngaih a nih avangin hnuhkir an rel a, Boundary Commission tihtawp a nih chuan eng anga hmalak chhunzawm tur nge tih an ngaihtuah lehna atangin Inbiakna neih a ngai tih chu an ngaihdan a ni a, inbiakna ah chuan enge an thu ken tur tih an ngaihtuah leh a, lehkha pawimawh hrang hrang buatsaih niin, ramri buaina zirchiangtu Manohakar Parokar Institute of Defence Studies and Analysis-in Mizoram an lo tlawh huna lo thehluh tur Sub-Committee-in an siam chu Boundary Committee puiin a pawm tawh tih a sawi bawk.
Home Minister chuan nikum July ni 26-a State pahnih sipaite an inkah hnu August ni 5-a Assam Minister pahnih Mizoram an lo zin tum a rawn kal Assam Border Protection and Development Minister, Atul Bora chuan buaina sutkian dan tur rawtna a hnenah a thlen thu leh chu rawtna chu tum 2 Vedio Conference hmangin an sawipui tawh tih a sawi a. Assam Minister hian Meghalaya nen an tih anga Regional Committee din ve tha a tih leh tih loh zawtin, tha an tih thu a lo hrilh tih a sawi a, amaherawh chu an ruahman dan kimchang nen CM a lo sawipui tur thu a hrilh a. Hei hi Vawiin thlengin an la nghak tih a sawi.
Engtik ni ah emaw chuan Boundary Committee beisei leh duhna chu engtik ni ah emaw chuan hmaichhan ah an la sawiho tur thu Home Minister chuan sawi bawkin, 1875 Notification chu an dinna a nih phawt tur thu leh an inbiak dan leh boruak that dan a zirin hma an lak chhunzawm zel tur thu a sawi bawk a ni.
Home Minister chuan Aitlang, Buar-chep leh Saihapui ‘V’ atangin Assam Police te hnawhchhuah tum an nih thu leh ramri a Police duty te thuam chakin sawrkarin hma a lak thu a sawi bawk a, Mizoram chin a ngaih hmun tam tak chu Assam awpna hnuaiah a awm thu leh chan kan la nih loh thu a sawi bawk.