MPCC OB leh MLA ten Media te an kawm

Kan mamawh ber chu sawrkar tha a ni - Lalsawta

Mizoram Pradesh Congress Committee (MPCC) President Lalsawta chuan, “Kan mamawh ber chu sawrkar tha a ni,” tiin Chief Minister a nih chuan Minister leh MLA hmingchhia te a ban tur thu a sawi.

MPCC Office Bearer Meeting in a lo rel tawh angin MPCC OB leh an Party MLA te chuan Inrinni khan Aizawl Press Club-ah thuthar thehdarhtute kawmin he hunah hian MPCC President Lalsawta chuan sum hmanga Voter mipuite lei a, ram rorelna luah chu kan ram leh mipui tan ram tlûkchhiat hlen theihna a nih avangin inthlana sum chakna chu an Party chuan tihhlum (thah) an tum tih a sawi a. “Kan Candidate te sum hmanga inlei tlin tum lo turin kan thunun ang,” a ti a. Ram leh mipui hriat leh ngaimawh khawpa sawrkar khap, Smuggling hi ram tlukchhiatna bul leh Mafia leh Cartel te'n ram rorelna an luhchilhna bul intanna a nih theih avangin Congress Party chuan an do tlat tih a sawi a, “Kan mamawh ber chu sawrkar tha a ni. Sawrkar tha nei turin Political Will neia ram leh mipui tana tha kan tihna tûr daltu apiang chu sut tlang kan tum ang,” a ti.

Ram roreltu leh kan ram chhunga eirukna, duhamna leh induhsakna dik lo, Restricted Tenders hman te, a mawhphurtu hriat theih loh khawpa Work Contracts hralh leh hnathawh chhe lutuk chu Congress Party in sawrkarna a chan chuan nuaibo a nih tur thu sawiin MPCC President chuan, Restricted Tender chu tihtawp a ni dawn tih a sawi a. Thalai leh loneitu, kuthnathawk leh kawmg hrang hranga eizawngte tan an mamawhna zawnah 'tang puihna' buatsaih te, mirethei, hnathawk thei lo leh dingchhuak tura rahbi tleu tawhte tanpuina tur siam a nih tur thu te sawiin, hlemhletna leh duhamna avanga ram rorelna a chhiat loh nan chutiang laka Minister leh MLA hmingchhia te chuan sawrkarah dinhmun an neih loh tur thu a sawi a, “Kan rawngbawl sak mipuite retheih zia ngaihtuah hian ram roreltute tan duham a theih loh,” a ti a. Ram rorelna felfai nei turin sawrkar tha, dik, tha leh huaisen (good, just and dynamic governance) kalpui a nih tur thu sawiin, sawrkar remruatna fing leh thatna hmuna mipuite an rinawmin khua leh tui tha an ni mai thin tih a sawi a, “Chutiang tur chuan Congress Party chuan thatlohtheihlohna bawm kan siam dawn a ni,” a ti bawk.

He hunah hian MPCC President Lalsawta lehkhabu ziah, ‘That loh theih lohna Bawm’ tih chu MPCC Vice President Lal Thanzara chuan a tlangzarh a, MPCC Treasurer Zodintluanga pawhin, “MPCC President Pu Lalsawta'n ‘Minister thawk tha lo leh MLA eiruk ching (Corrupt) emaw, hnathawk tha lo emaw an awm a nih chuan, President ka nihna angin ka ban ngam ang,’ a tih kha tha ka ti hle a. He that loh theih lohna bawmah hian tumah hi kan that loh theih ka ring lo a. Sawrkar hnathawk tha duh lo thlengin he ‘That loh theih lohna bawm’ a tel turin kan rilru leh ngaihtuahna kan sen thar a ngai,” a ti bawk.