Ex-MNA te Mau chinna hmun Minister in a tlawh

Ex-MNA Multipurpose Cooperative Society Limited ten Saiphal zau, Mamit District-a Bamboo Plantation-a Mau, Rawmi leh Brandisii an chin te chu Inrinni khan Commerce & Industries Minister Dr. R. Lalthangliana chuan a hmunah kalin an hmalakna a enpui.

Dr. R. Lalthangliana chuan Mau chungchanga Chief Minister hmathlirna chu ram hmasawnna atan a pawimawh dante sawiin, Ex-MNA member te chu Bamboo Plantation a hlawhtlin ngei nan theihtawp chhuaha tan la turin a chah a. Tun Sawrkar chuan sawrkar hmasa te thil tih, tha nia a hriat te chu an chhunzawm thu sawiin, chutiang bawkin tu pawh lo Sawrkar ta sela, an hmalakna te chhunzawm tlak ni thei tura tan la turin a chah bawk.

Helai hmunah Mau tharchhuah dan a zirin Mau sawngbawlna, Semi Processed anga a buaipui theihna tur hmarua leh khawl bun Ex-MNA te an rawt chu Minister chuan tha a ti a. Changel atanga lazai siamchhuah theih dan kawng dap chu tha tiin hei hi Bamboo Development Agency lamin lo zir chhin se a ti bawk.

Ex-MNA Bamboo Plantation hi SEDP hnuaia Mau chungchang a hmalaknaa Pilot Project a ni a, Saiphal zau hi West Serzawl bul atanga pengin Aizawl atangin KM 78 vel hla a ni a, he Society-ah hian member 115 awmin chungte chu beneficiary an ni vek a, a ram hi Tin 600 hmun vela zau niin ram hectare 180 a zau ah Rawmi leh Brandisii tiak 66,500 an phun a ni. He hunah hian Minister hi SEDP hnuaia Bamboo Development Board Vice Chairman Dr. K. Pachhunga’n a tawiawm a ni.