Contractor dang in Ngaizawl kawng siam dawn

Khawzawl District-a Ngaizawl khaw mipui ten an khaw kawng siam chungchanga lungawilohna an lantir hnuah Mizoram sawrkar chuan hnathawktu tur Contractor dang a ruat thar tawh nia thudawn a ni.

Thudawn danin, Ngaizawl khaw kawng siam hna chu a tira Contractor thlan tawh sa hming pu zui thoin, a hnuaia thawk turin Zoremtluanga, Zemabawk, Aizawl (Chawngthu Construction) thlan a ni a, hnathawktu tur hian February 4, 2022 khan Ngaizawl khua tlawhin, NGO hrang hrangte nen inkawmna an nei a. Hnathawktu tur hian tunkar chho atang hian hnathawhna tur bungrua te lalutin, remchang hmasa berah hna a thawk tan dawn a ni.

Khawzawl leh Ngaizawl inkar kawng PMGSY kawngpui KM 13.4-a thui Black Topping leh White Topping hna hi First Class Contractor Collin Lalsangpuii, Aizawl Electric Veng hminga thawh a ni a, a hnuaiah Romuanpuii Zadeng chuan kawngpui siam hna hi a thawk a. Kum 2017 atanga thawk tanin kum li leh thla thum chhung an thawh hnuah KM 3.7-a thui chauh an la thawk a, hri leng avanga an hna hi thawk tha thei lova insawiin, hnathawh hun pawhsei sak an dil a, kumin March thlaa tawp tawh tur chu September, 2022 thleng pawh seisak a ni a. Heti chung hian a zo hman dawn lo ah Ngaizawl khaw NGO Coordination Committee leh VC te chuan an ngai a, Ngaizawl khaw mipui lungawi lo chuan kawng siam hna thawktute buk chu February 21, 2022 khan an thiah sak a ni. He thil thleng chungchangah hian contractor hming hawh a hnathawktu Romuanpuii Zadeng chuan Ngaizawl NGO hruaitute leh VCP lakah February 25, 2022 khan FIR a thehlut a, khawtlang hruaitute hi Feb. 28, 2022 khan Khawzawl Police Station-ah an inlan a ni.