Mizoram State Health Care-ah Bill pek theih loh cheng vbc. 59.63 chuang a awm mek
Health Minister Dr. R. Lalthangliana'n Mizoram State Health Care-ah Bill pek theih loh cheng vbc. 59.63 chuang a awm mek tih Assembly House a hrilh.
Nimin-a Assembly inkhawm ah Congress Member Lalrindika Ralte zawhna leh zawhbelhna dangte a chhannah Health Minister hian mipuite damdawi-a an inenkawlna senso, Health Care Bill pek theih a nih loh chhan hi Sawrkar sum indaihlohna avang a ni tih a sawi a. Tunah hian State Health Care Corpus Fund atangin cheng vbc. 4 pekchhuah a nih dawn bakah Finance Department lamin State Sawrkar sum hman bang an dapkhawm mek a, cheng vbc. 5 pe tura file kal tir mek a ni a. Hei hi a hlawhtlin chuan bill tang engemaw chen chu a sutkian theih beisei a ni tih a sawi a ni.Dr. R. Lalthangliana chuan, Mizoram State Health Care Scheme hi MNF Sawrkar hmasa, kum 2008 April atanga kalpui tan a nih thu leh budget-ah pawh vbc. 50 dah niin, Insurance Comany-ah Open Competitive Bidding kaltlanga kalpui a ni tih a sawi a. Asian Development Bank atangin US Dollar maktaduai 20 Corpus Fund-ah dah niin, a pung atanga intungnung tura kalpui a ni tih a sawi a. Kum 2018-a an Sawrkar leh hnuah October ni 1, 2019 khan Chief Minister hova thukhawm chuan Health Care chu kalpui leh turin an rel a, Revised Health Care Scheme chu a tira kalpui angin kalpui leh a ni a, natna zawng zawng bill theih turin ruahman a ni tih a sawi a. Tunah hian Chief Minister hmalakna-in Finance Department-in theihtawp an chhuah thu leh Externally Aided Project hnuaiah Asian Development Bank atangin cheng vbc. 1,000 kalpui tura ruahman a ni a, Sawrkar laipui-a kaltlang tur External Affairs Ministry, Ministry of Expenditure, DoNER leh Niti Aayog-ah te a kal zo thawkhat tawh a. Tunah hian beisei awm takin thil a kal mek a. An ruahman anga cheng vbc. 1,000 kalpui theih a nih chuan a pung atangin mipui inenkawlna senso chu harsa lutuk lova kalpui thei beisei a ni tih Health Minister chuan a sawi a ni.
He hunah hian House Leader, Chief Minister Zoramthanga chuan chhungtin in an damloh-a an hman tur SEDP-ah nuai 2 dah a nih thu a sawi chu nuai 2 thleng an bill thei tih an sawina a ni tih a sawi bawk a, Health Care Scheme chu State dang pawhin an tih theih loh a nih avangin tlin leh tlin lovin an ti hram hram tih chu chiang takin a lang a ni tih a sawi a, tan an la chho zel anga, mipui harsatna sukiang ngei turin tan an la chho zel dawn tih sawiin, “Sawrkar kum tharah chuan sum dinhmun pawh tlemin a ziaawm deuhlek turah ngai a, mipuite pawhin a hma aiin Bill an lak that theih beisei a ni,” a ti bawk.