Sa himna tur a nih chuan Mizoram pan zel turin sawm

Central YMA President R. Lalngheta chuan Myanmar-a Mizo hnahthlak te chu an sa himna tur a nih phawt chuan Mizoram lam rawn pan zel turin a sawm.

Hangzo Natural Park leh Zo Friendship International te tangkhawp in Myan-mar ram buai avanga an sahim nana Mizoram rawn pan Zohnahthlak te puala ‘Thla hualna’ nimin tlai-a an buatsaih a hmanpuina ah he thu hi sawiin Central YMA President R. Lalngheta chuan Myanmar Rama awm kan unauten harsatna an tawk chu pawi an tih thu a sawi a, “Hreawm kan tihpui a, kan tawrhpui tak meuh meuh a. Mizo leh Zohnahthlak nunna hi a hlu a, in sahimna tur a nih dâwn phawt chuan Mizoram lam rawn pan zel turin kan sawm che u a ni. Unaute chuan a thlum a al kan eiza tur a ni,” a ti a. He kan harsatna tawh hian kan in unauna hi lo ti nghet sela, chibing leh chibil-a hmalakna awm lo a, Mizo-ah hian lungawi tlang thei ila a duhthu a sawi a. Kan unau Raltlan te Thla hualna hun buatsaih saktute chungah lawmthu a sawi bawk.

He hunah hian raltlan te aiawhin Kalemyo Constituency MP Khawltinsiami pawhin thu a sawi a, “Zohnahthlakte hi ramin min then mah se hnam erawh chuan min then thei lo,” tiin “Kan Inpui-ah kan lo tlanchhia a, Mizo mipuite zingah min ngaitheilo hmel leh hmel hlimawm lo kan la hmu lote hi kan lawm hle a ni,” a ti a. Burma a ralmuan veleh tlawh ve ngei turin Mizo mipuite a sawm bawk.

Nimin-a he hun buatsaih ah hian Myan-mar Sipai hotuten Sawrkarna an pawng lak hmaa Myanmar Sawrkar-a MP 21 te leh Raltlan engemaw zat an tel a. Mizoram Rural Bank Chairman V. Jaya Chandra chuan raltlanten an mamawha an hman turin cheng nuai sawm a hlan bawk. He hunah hian Mizoram leh Myanmar atanga raltlan zinga zaithiam ten zaiin mipui an awi bawk a ni.